Roma nacionpi rey Auguston kamachikuran llapa runakuna nacesqanku llaqtapi padronachikunankupaq. Chaymi Joseqa Mariata pusarikuspa Belén llaqtata riran chay llaqtamanta kasqanrayku, chayqa Jerusalén llaqtaq uray ladonpin kasharan.

Askha runataq Belén llaqtata padronachikuq riranku chayqa, manan may wasipipas Joseqa alojakuyta atiranchu, chaymi uywa kanchallapiña alojakuran. Chaypin Mariaqa Jesusta onqokuran, jinaspa telakunawan k’uyuspa uywa qaranaman churaykuran.

Dios munaqtinchá rey Augustoqa kamachikuran runakuna padronachikunankupaq. Chhaynapin Jesusqa ñaupa taytan rey Davidpa llaqtan Belenpi naceran. Diospa simin qelqapiqa qelqasqañan kasharan chay llaqtapi juj jatun kamachikuq nacenanmanta (Miqueas 5:2).

¡Jesuspa nacesqan tutaqa ancha importanten karan! Chay tutan Jehová Diospa lliflli kaynin k’anchaykuran campopi kashaq michiqkunaman, jinan juj ángel paykunata niran: “Ama mancharikuychischu, allin willakuykunatan willasaykichis, chaywanmi llapa runakuna anchata kusikunqaku. Kunanmi Davidpa llaqtanpi juj salvaq nacepusunkichis, payqa Criston, Señortaqmi kanpas. Khaynapin yachankichis pay kasqanta: Juj wawatan tarinkichis telawan k’uyusqata uywa qaranapi puñushaqta”, nispa. Chayllamanmi juj angelkunapas rijurimuranku, jinaspa takiranku: “Diosqa janaq pachapi jatunchasqa kachun, Diospa sumaq qhawarisqan runakunapaqtaq kay pachapi thaj kay kachun”, nispa (Lucas 2:10-14).

Angelkuna ripuqtintaq michiqkunaqa: “Kunanpacha jaku Belén llaqtata Jehová Diospa willawasqanchisman jina imachus pasasqanta rikumunanchispaq”, nispa ninakuranku, jinaspa usqhaylla Belén llaqtata riranku (Lucas 2:15). Chaypin angelpa nisqanta jina Jesusta tariranku, jinaspa willakuranku chay angelpa imachus nisqanta. Chayta uyariqkunaqa anchatan admirakuranku. Mariataq tukuy chaykunata sonqollanpi jap’ikuran.

Kay tiempopiqa askhan ninku: “Jesusqa 25 de diciembrepin naceran”, nispa. Chay killan ichaqa Belén llaqtata nishuta chirin paran ima, mayninpiqa rit’imun imaraqmi. Chay killapiqa manapunin michiqkunaqa campopi ovejankuta qhawaspa tutapi kashankumanchu karan. Chaymantapas chhayna chiri tiempopiqa manan Romapi reyqa runakuna padronachikunankupaq kamachikunmanchu karan, chayta ruwaspaqa astawanchá runakunata phiñachinman karan. Chhaynaqa, q’oñi tiempopin Jesusqa nacenman karan, yaqapaschá octubre killapi.