César Auguste, togbia ti Rome, amû lani yanga ti tene azo kue ague asara recensement. Ni la, Joseph na Marie adoit lani ti kiri na ndo so a dü Joseph dä, na Bethléhem, mbeni gbata so ayeke na mbage ti sud ti Jérusalem.

Gbâ ti azo aga na Bethléhem ti sara recensement. Ni la, oko ndo ti lango so Joseph na Marie awara lani, a yeke mbeni place so a yeke bata akororo nga na ambeni nyama nde dä. A yeke na place ni so la a dü Jésus dä. Marie aroulé Jésus na mbeni yongoro lê ti bongo na lo zia lo na yâ ti place ti tengo kobe ti anyama ni so.

A yeke Nzapa la apusu César Auguste ti lu ndia ti recensement so. Lo sara tongaso ndali ti nyen? Ndali ti so a yeke sara si a dü Jésus na Bethléhem, gbata ti kotara ti lo Gbia David. Mbeti ti Nzapa afa ândö awe so, a yeke duti ande na gbata so la si a yeke dü Mokonzi so a sara tënë ti lo kozo awe.—Michée 5:2, FD.

Bï ni so ayeke nde mingi na atanga ni! Mbeni kota wâ aza na tere ti groupe ti aberger so ayeke na yâ ti benyama. So gloire ti Jéhovah la! Mbeni oko ti a-ange ti Jéhovah angbâ asara tënë na aberger ni atene: “Ala sara mbeto ape. Mbi ga ti fa na ala nzoni tënë so ayeke mû ande kota ngia na azo kue, ngbanga ti so laso, na gbata ti David, a dü na ala mbeni sauveur, so ayeke Christ nga Seigneur. Ye so ayeke mû lege na ala ti hinga na lo ayeke so: Ala yeke wara ande mbeni foroto so a kanga lo na bongo na so alango na yâ ti ndo ti tengo kobe ti anyama.” Mo ye ti bâ, gbâ ti a-ange aga na ala tene: “Gloire na Nzapa so ayeke na yayu, nga na ndo ti sese, azo so Nzapa asara nzoni bê na ala ayeke duti ande na siriri.”—Luc 2:10-14.

Na peko ti so a-ange ni ahon awe, aberger ni asara tënë na popo ti ala atene: “E gue hio na Bethléhem ti bâ ye so asi so, so Jéhovah asara si e hinga ni so.” (Luc 2:15). Tongaso, ala gue kâ hio na ala wara Jésus, so a dü lo fini fini, tâ gi na place so ange ni afa fade na ala so. Li ti azo kue akpe, na ngoi so aberger ni afa na ala peko ti ye so ange ni atene na ala. Marie abata atënë so kue na yâ ti bê ti lo nga lo yeke gbu li ti lo na ndo ti nda ti atënë so.

Mingi ti azo apensé atene a dü Jésus na lango 25 ti nze ti décembre. Ye oko, na Bethléhem, nze ti décembre ayeke mbeni nze so ngu ayeke pika dä mingi nga dê ayeke sara mingi. Même na ambeni ngoi, neige ayeke tï na ndo ni so. Ni la, na amara ti angoi tongaso, a yeke ngangu ti wara aberger na gigi na batango anyama ti ala na bï. Na ndo ni, togbia ti Rome apeut lani ti hunda pëpe na mara ni so, so ayeke azo so ayeke nduru ti ke yanga, ti sara mbeni voyage teti alango mingi na lege, na yâ ti mara ti dê tongaso, ndali ti tënë ti recensement. Aye afa so a dü lani Jésus na yâ ti nze ti octobre tongaso.