Moemphera oa Roma ea bitsoang Cesare Augustase o laela hore motho e mong le e mong a ingolise. Maria le Josefa ba ea Bethlehema * e leng moo Josefa a hlahetseng teng.

Batho ba bangata ba tlile Bethlehema ho tl’o ingolisa. Kahoo, ha ho moo Maria le Josefa ba ka fihlelang teng ntle le setaleng moo ho lulang litonki le liphoofolo tse ling. Jesu o hlahela hona moo ’me Maria o mo thatela ka masela, o mo beha ka sejelong.

E tlameha ebe ke Molimo ea susumelitseng Cesare Augustase hore a laele batho hore ba ingolise. Taelo ena e entse hore Jesu a hlahele Bethlehema motseng oa moholo-holo oa hae Davida. Mangolo a ne a ile a profeta hore Morena ea tšepisitsoeng o tla tsoalloa Bethlehema.​—Mikea 5:2.

Bona ke bosiu ba bohlokoa ka ho fetisisa. Koana naheng, ho hlaha khanya e matla ho pota-pota balisana. Ke khanya e tsoang ho Jehova! Le leng la mangeloi le re ho balisana bana: “Le se ke la tšoha, etsoe bonang! ke le bolella litaba tse molemo tsa thabo e kholo eo batho bohle ba tla ba le eona, hobane kajeno le tsoaletsoe Mopholosi, e leng Kreste Morena, motseng oa Davida. Sena ke pontšo bakeng sa lona: Le tla fumana lesea le thatetsoeng ka masela ’me le robetse ka sejelong.” Joale ka tšohanyetso ho hlaha mangeloi a mangata ’me a re: “Khanya e be ho Molimo bophahamong bo holimo, ’me khotso e be har’a batho bao a khahloang ke bona lefatšeng.”​—Luka 2:​10-14.

Hang ha mangeloi ao a tloha, balisana bana baa buisana ba re: “A re eeng Bethlehema ’me re bone ntho ena e etsahetseng, eo Jehova a re tsebisitseng eona.” (Luka 2:​15) Ba tloha ba tatile ba ea moo Jesu a hlahetseng teng, ’me ha ba fihla ba bolella Maria le Josefa hore na ba bone’ng. Ha ba utloa tlaleho ena ea balisana, ba utloa ba hlolletsoe. Maria eena o nka taba ena e le ea bohlokoa ’me o boloka lintho tsena ka pelong ea hae.

Batho ba bangata ba lumela hore Jesu o hlahile ka la 25 December. Leha ho le joalo, eo ke nako ea lipula le serame Bethlehema, ’me ka linako tse ling lehloa lea khetheha. Ka nako eo ea selemo, ho ne ho ke ke ha etsahala hore ebe balisana ba alositse mehlape ea bona naheng bosiu. Hape batho ba ne ba se ba ntse ba batla ho fetohela ’muso oa Roma, kahoo Moemphera oa Roma o ne a ke ke a laela batho hore ba nke maeto a malelele nakong ea mariha hore ba il’o ingolisa. Kahoo, ho bonahala Jesu a hlahile nakong eo ho neng ho futhumetse, mohlomong ka October.