Kayisara Ogasito yo wenga fumu ya Ufumu wa Roma, wangulamula kuti munthu weyosi waluti kwawu kuti wakalembesi. Mwaviyo, Yosefi ndi Mariya akhumbikanga kuluta kutawuni ya Betelehemu, kumwera kwa Yerusalemu. Kwenuku ndiku kwenga kumuzi waku Yosefi.

Tawuni ya Betelehemu yinguzaza ndi ŵanthu wo anguza kuzilembesa. Chifukwa cha venivi, kwenga kwakusuzga kusaniya malu ngakugona, mwakuti Yosefi ndi Mariya angugona mukhola la viŵetu. Mwenumu ndimu Yesu wanguwiya. Mariya wangumuvunga musalu ndi kumugoneka muchakuryisiyamu viŵetu.

Chiuta watenere kuti ndiyu wanguchitiska Kayisara Ogasito kujalikisa dangu lakuti ŵanthu akalembesi. Ntchifukwa wuli tikamba viyo? Chifukwa venivi vinguchitiska kuti Yesu wakawiyi ku Betelehemu, tawuni yo mwajanga Fumu Davidi ambuyaki. Malemba ngangukambiya limu kweche vyaka vinandi kuti tawuni yeniyi ndiyu mwatingi muwiyengi Fumu yo yingulayizgika.—Mika 5:2.

Usiku wo Yesu wanguwiya wenga wapade ukongwa! Aliska wo aliskanga viŵetu kudondu anguwona ukweru wakuziziswa wo unguzunguliya malu ngo anguja. Ukweru wenuwu ungulongo unkhankhu waku Yehova! Mungelu yumoza waku Chiuta wanguŵakambiya kuti: “Mungachitanga mantha cha. Nditikukambiyani uthenga wamampha wa likondwa likulu lo ŵanthu wosi aŵengi nalu. Chifukwa msanawale mutawuni yaku Davidi mwakuwiyani mtaski, yo ndi Khristu Ambuya. Ndipu vo vakukuwovyani kuti mukamuziŵi ndi ivi: Mwamusaniya bonda yo amuvunga musalu ndipu amugoneka muchakuryisiyamu viŵetu.” Mwamabuchibuchi, panguza so angelu anyaki ndipu akambanga kuti: “Unkhankhu kuchanya kwaku Chiuta ndipuso chimangu pacharu chapasi pakati pa ŵanthu wo Chiuta wakondwa nawu.”—Luka 2:10-14.

Angelu ŵati atuwapu, aliska angwamba kukambiskana kuti: “Tiyeni tiluti ku Betelehemu, tingatondekanga cha, tikawoni vo vachitika, vo Yehova watiziŵisa.” (Luka 2:15) Yiwu anguluta mwaliŵi ndipu anguchimusaniya nadi Yesu kumalu ngo mungelu wanguŵakambiya. Aliska ŵenaŵa akambiyanga ŵanthu vo mungelu wanguŵakambiya. Ndipu weyosi yo wanguvwa nkhani iyi wanguzizwa ukongwa. Mariya wangusunga vosi vo aliska angukamba ndipu waŵanaŵaniyanga vo mazu ngenanga ngang’anamuwa.

Mazuŵa nganu, ŵanthu anandi agomezga kuti Yesu wanguwa pa 25 December. Kweni mu December ku Betelehemu ndi nyengu ya vuwa ndipuso kuzizira ukongwa. Mu nyengu iyi aliska angaluta cha kudondu usiku kuti akaliski viŵetu. Kweniso fumu ya Roma yatingi yiŵakambiyengi cha ŵanthu wo alekanga kali kukondwa ndi ulamuliru waki kuti ayendi kwa mazuŵa nganandi munyengu yakuzizira kuchilembesa. Kweni viwoneka kuti Yesu wanguwa mu chihanya, panyaki mu mwezi wa October.