Kaisara Augusito, imwami wa Bulelo bwa Roma walailila kuti bantu boonse balembwe. Aboobo ba Josefa a Mariya balaunka kumunzi nkwaakazyalilwa Josefa, imunzi wa Betelehemu, kumusanza kwa Jerusalemu.

Bantu banji bali mumunzi wa Betelehemu kutegwa balilembye. Busena bulikke bwakukkala mbobajana ba Josefa a Mariya ncaanda cabanyama, imujalilwa mbongolo abanyama bambi. Oomu momumo mwaazyalilwa Jesu. Mariya wamuvwungaila mwana mumilembo akumulazika mucilido cabanyama.

Kuboneka kuti Leza ngookapa kuti Kaisara Augusito abikke mulawo ooyu wakulilembya. Nkaambo nzi? Nkaambo eeci cakapa kuti cikonzyeke kuti Jesu azyalilwe mu Betelehemu, imunzi wasikale wakwe Mwami Davida. Imyaka minji musyule, mu Magwalo kwakalaambidwe kale kuti ooyu ngomunzi mwaakali kuyoozyalilwa Muleli ooyo wakasyomezyegwa.​—Mika 5:2.

Eelo kaka oobu mbusiku bupati! Kabali musyokwe, imumuni uumweka kapati wabamwekela beembezi. Oobu mbulemu bwa Jehova! Umwi akati kabangelo ba Leza waambila beembezi kuti: “Mutayoowi, amubone! Ndamuletela makani mabotu aayoobakkomanisya kapati bantu boonse. Nkaambo sunu mumunzi wa Davida, mwazyalilwa mufwutuli, nkokuti Kristo Mwami. Lino mboobu mbomuyoomuzyiba: Muyoojana mwana muvwanda kavwungaidwe muzisani alimwi kalede mucilido cabanyama.” Ndilyonya kwalibonya bangelo bambi banji ibaamba kuti: “Aalemekwe Leza kujulu lyamajulu alimwi anyika akube luumuno kubantu mbakkomanina.”​—Luka 2:10-14.

Bangelo nobaunka, beembezi batalika kwaambilana kuti: “Katuya ku Betelehemu lino aawa tukabone cintu eeci cacitika, eeco Jehova ncaatuzyibya.” (Luka 2:15) Baunka cakufwambaana, eelyo bamujana Jesu iwazwa akuzyalwa abusena mpoonya aawo mungelo mpaabaambila kuti bayoomujana. Beembezi nobaluula nzyaabaambila mungelo, boonse ibaamvwa makani aaya bagambwa. Mariya waayobola makani aaya oonse mumoyo akuyeeya ncaamba.

Mazuba aano bantu banji basyoma kuti Jesu wakazyalwa mu December 25. Pele mucooko imuli munzi wa Betelehemu, mumwezi wa December inga kuwa mvwula alimwi kulatontola. Alimwi mane zimwi ziindi inga kuloka caanda. Aboobo aciindi eeci camwaka, takulangilwi kuti beembezi inga kabali anze musyokwe imasiku amatanga aabo. Kunze lyaboobo, takulangilwi kuti mwami wa Roma wakali kukonzya kulailila bantu ibakali kuyanda kale kumuzangila kuti beende musinzo uutola mazuba manji kuti baunke kuyoolilembya aaciindi nokutontola kapati. Aboobo kuboneka kuti Jesu wakazyalwa cakuma October.