Mapakgsina xalak Roma César Augusto kalimapakgsinit putum latamanin pi kaʼankgolh tatsokgtawilakgo niku tapakgsikgo. José chu María ankgo tatsokgtawilakgo kBelén xlakata anta lakachilh José.

Xlakata lhuwa latamanin ankgonit tatsokgtawilakgo kBelén, nialh anan niku natawilakgo José chu María chu tamakgxtakgkgo niku kamakikan animales. Anta lakachin Jesús. María limakgchi maktum lhakgat chu mami anta niku wayankgo animales.

Wa Dios tiku tlawanit pi César Augusto nalimapakgsinan pi latamanin kaʼankgolh tatsokgtawilakgo. ¿La katsiyaw? Xlakata Tatsokgni makgasa xlichuwinanit pi kBelén x’ama lakachin mapakgsina tiku xmalaknukanit (Miqueas 5:2). Chu wa xlakata Jesús lakachin kBelén, kachikin niku xtapakgsi mapakgsina David xkilhtsukut Jesús.

Uma tsisni lay tuku kaks malakawaninan. Kkalakgwan, akgtum xkgakganat tasiya niku xwilakgo xkuentajtlawananin borrego. ¡Wa xlilanka Jehová! Chatum xʼángel Dios kawani: «Ni kapekuantit, xlakata ¡kaʼakxilhtit!, kkamakatsiniman xatlan tamakatsin xla lhuwa tapaxuwan nema putum latamanin nakgalhikgo. Xlakata uku lakachilh anta kxkachikin David chatum milakgmaxtunakan, wa Cristo Malana. Wa uma tuku nalikatsiyatit pi wa: natekgsatit aktsu skgata limakgchikanit laktitsu lhakgat chu mamikanit niku kamawikan animales». Kaj xalan tasiyakgo tlakg lhuwa ángeles chu wankgo: «Katamalankilh Dios kʼakgapun, chu kkatiyatni kakgalhikgolh takaksni latamanin tiku tlan kaʼakxilha Dios» (Lucas 2:10-14).

Akxni ángeles ankgo, xkuentajtlawananin borregos lawani: «Kaʼaw uku kBelén chu naʼakxilhaw uma tuku Jehová kinkamakatsinin» (Lucas 2:15). Lakapala ankgo akxilhkgo skgata nema aku lakachinit chu tekgskgo niku ángel xkawaninit. Akxni xkuentajtlawananin borrego wankgo tuku ángel kawaninit, latamanin kaks lilakawankgo. Pero María maki kxnaku umakgolh tachuwin.

La uku, lhuwa tiku lakpuwankgo pi Jesús lakachilh 25 xla diciembre. Pero kBelén, uma kilhtamaku lu lonkgnan chu min sen. Lakgachunin asta min miki. Uma kilhtamaku xkuentajtlawananin borrego ni xtamakgxtakgkgolh kkalakgwan katsisni. Mapakgsina na ni xkaskinilh kachikin pi x’ankgolh tatsokgtawilakgo akxni lu xlonkgnama, xlakata uma kilhtamaku kachikin xtalalakatawakamakgo. Wa xlakata xlilat nalakpuwanaw pi Jesús lakachilh akxni ni xlonkgnama, max octubre lakachilh.