Sisar Ogastus, em empera bilong Rom, i putim lo olsem olgeta man i mas rejistaim nem bilong ol. Olsem na Josep na Maria i mas go long taun em Josep i bon long en, em Betlehem, long hap saut bilong Jerusalem.

Planti man i go long Betlehem bilong rejistaim nem bilong ol. Olsem na wanpela ples tasol em Josep na Maria inap stap long en em haus bilong ol animal, ol donki na ol arapela animal i save stap long en. Long dispela hap Maria i karim Jisas. Em i karamapim Jisas long hap laplap na i slipim em insait long bokis kaikai bilong ol animal.

Ating God yet i bin givim tingting long Sisar Ogastus na em i putim dispela lo long olgeta manmeri i mas go bek long asples na rejistaim nem bilong ol. Bilong wanem dispela samting i kamap? Long wanem, dispela i opim rot long Maria inap karim Jisas long Betlehem, em asples bilong tumbuna bilong en King Devit. Long bipo yet, Baibel i tok profet olsem dispela Hetman em God i tok promis long en bai kam long dispela taun.—Maika 5:2.

Em wanpela spesel nait tru! Wanpela lain wasman bilong sipsip i was long ol sipsip long ples ausait long taun, na bikpela lait i raunim ol. Dispela em strong bilong Jehova! Wanpela ensel bilong God i tokim ol wasman bilong sipsip: “Yupela i no ken pret. Harim! Mi autim gutnius long yupela long bikpela amamas em olgeta manmeri bai kisim. Long wanem, tude long taun bilong Devit, wanpela meri i karim pikinini, em Seivia bilong yupela, em i Krais na em i Bikpela. Na yupela bai luksave long em olsem: Yupela bai lukim wanpela bebi em ol i pasim long hap laplap na em i slip i stap long bokis kaikai bilong animal.” Na wantu bikpela lain ensel i kamap na i tok: “Mipela i givim glori long God i save stap antap tru, na long graun bel isi i ken i stap namel long ol man em God i orait long ol.”—Luk 2:10-14.

Taim ol ensel i lusim ol, ol wasman bilong sipsip i toktok namel long ol yet olsem: “Yumi go hariap long Betlehem na lukim dispela samting em Jehova i bin kamapim long yumi.” (Luk 2:15) Kwiktaim ol i go na ol i lukim bebi Jisas i slip i stap long bokis kaikai bilong animal olsem ol ensel i bin tok. Taim ol wasman bilong sipsip i stori long samting ol ensel i tokim ol long en, olgeta man husat i harim dispela stori i kirap nogut. Maria i tingim tru ol dispela tok, na em i putim i go daun long bel bilong en.

Long nau, planti man i bilip olsem Jisas i bon long Disemba 25. Tasol long hap bilong Betlehem, mun Disemba em taim bilong ren na bikpela kol. Na sampela taim sno i save pundaun. Long dispela taim bilong yia, ol wasman i no inap kisim ol sipsip bilong ol i go ausait na was long ol long nait, nogat. Na tu, empera bilong Rom i no inap singautim ol man husat i tingting pinis long bikhet long gavman long wokabaut inap sampela de long taim bilong bikpela kol bilong rejistaim nem bilong ol. So i luk olsem Jisas i bon long mun Oktoba samting.