Ne fakatonu atu a te tupu o te Malo o Loma, ko Kaisala Aokuso, me e ‵tau o fakamau a igoa o tino katoa. Tela la, ne ‵tau o faima‵laga atu a Iosefa mo Malia ki te fa‵kai ne fanau a ia i ei, ko te fa‵kai o Peteleema, i te feitu ki saute o Ielusalema.

E tokouke a tino ne olo atu ki Peteleema o tusi olotou igoa. E tasi eiloa te koga ne mafai o maua ne Iosefa mo Malia ke mafai o ‵nofo lāua i ei ko te fale fagai manu, telā ne tausi ei a asini mo nisi manu foki penā. Ne fanau eiloa a Iesu i konā. Ne fakapulupulu ne Malia a ia ki laugatu kae ne fakamoe a ia i te tali fagai manu.

Ne fakamautinoa aka eiloa ne te Atua, ke fai ne te Kaisala ko Aokuso a te tulafono tenei ki te tusiga o igoa. Kaia? Ke mafai ei o fanau mai a Iesu i Peteleema, te fa‵kai o tena tupuga ko te Tupu ko Tavita. Ko leva ne ‵valo mai i te Tusi Tapu me tenei te fa‵kai e ‵tau o fanau mai i ei a te Tino pule telā ne folafola mai.—Mika 5:2.

Ko se faka‵tau eiloa i te tāua o te po tenei! Ne maina atu se mainaga malapulapu ki se potukau o tausi mamoe i te vao. Ko te ‵malu tenā o Ieova! Ne fai atu se agelu e tokotasi a Ieova ki tausi mamoe: “Sa ma‵taku, me kiloke! ko folafola atu ne au ki a koutou te tala ‵lei kae fakafiafia telā ka maua ne tino katoa. Me ko oti ne fanau mai ki a koutou i te aso tenei se fakaola, telā ko Keliso te Aliki, i te fa‵kai o Tavita. Kae tenei la te fakailoga mō koutou: Ka maua atu ne koutou se pepe e fakapulupulu ki potu laugatu kae e moe i se tali fagai manu.” Ne ‵sae fakapulele mai a nisi agelu e tokouke kae fai atu: “Ke vikia te Atua telā e nofo i koga ma‵luga, kae ko te filemu ke i luga i tino kolā e fiafia a ia ki ei i te lalolagi.”—Luka 2:10-14.

I te taimi ne olo keatea ei a agelu, ne fakatau fai‵pati a te kau tausi mamoe, penei: “Tatou ka olo nei eiloa ki Peteleema ke lavea ne tatou te mea ko oti ne tupu, telā ne fakailoa mai ne Ieova ki a tatou.” (Luka 2:15) Ne olo fakavave atu latou kae ne maua ne latou a te pepe ne fatoa fanau, ko Iesu e pelā eiloa mo muna a te agelu. I te taimi ne taku atu ei ne tausi mamoe a mea kolā ne fai atu ne te agelu ki a latou, ne ōfo a tino katoa kolā ne fakalogo‵logo. Ne fakatāua ne Malia a pati katoa konā kae ne tausi ne ia i tena loto.

E tokouke a tino i aso nei e tali‵tonu me ne fanau a Iesu i te po 25 o Tesema. Kae ko Tesema ko te taimi e ‵to ei a vaiua kae e ‵moko ‵ki i kogā koga o Peteleema. I nisi taimi, e mafai o ‵to te kiona. I te taimi tenā o te tausaga, e faigata eiloa ki tausi mamoe ke ‵nofo atu i te vao i te po fakatasi mo olotou lafu. Kae kāti e se mafai foki ne te tupu o Loma o fakatonu atu ki ana tino kolā ne fia ‵teke atu ki a ia ke fai ne latou se malaga i te kogāloto o te vaitaimi o te tau ‵moko ke tusi ei olotou igoa. E fakamaoni faka‵lei mai i ei, me ne fanau a Iesu i se taimi i a Oketopa.