Ua faaue Kaisara Auguso, te emepera no Roma, e ia tapaohia te iˈoa o te mau taata atoa. Ua titauhia ïa ia haere Iosepha raua Maria i Betelehema, te hoê oire i te pae apatoa ia Ierusalema, i reira Iosepha i fanauhia ˈi.

Mea rahi te ratere i Betelehema no te tapao i to ratou iˈoa. Te vahi noa ta Iosepha raua Maria i ite mai ei nohoraa, te hoê ïa fare i reira e vaiihohia ˈi te asini e te tahi atu mau animara. I reira Iesu i fanauhia ˈi. Vehî ihora Maria ia ˈna i te ahu e tuu atura ia ˈna i roto i te hoê vahi e paruhia ˈi te animara.

Eita e ore e na te Atua i turai ia Kaisara Auguso ia faaue e tapao i te iˈoa. No te aha? Na roto hoi i taua ravea ra e fanauhia ˈi Iesu i Betelehema, te oire fanauraa o to ˈna tupuna te arii Davida. Mea maoro to te mau Papai tohuraa e i taua oire ra e fanauhia ˈi te Faatere tei fafauhia.—Mika 5:2.

E po faufaa mau â taua po ra! Te parahi ra te tahi mau tiai mamoe i rapae. Anaana maira te hoê marama e ati aˈe ia ratou. O te hanahana ïa o Iehova! Na ô maira te hoê melahi a te Atua i te mau tiai mamoe: “Eiaha e mǎtaˈu, inaha hoi ua haere mai au e faaite atu i te tahi parau apî oaoa e oaoa roa ˈi te taata atoa. I teie hoi mahana i te oire o Davida, ua fanauhia mai te hoê faaora, oia hoi te Mesia ra te Fatu. Teie te tapao: E ite outou i te hoê aiû vehîhia i te ahu i roto i te hoê vahi e paruhia ˈi te animara.” Fa atoa maira e rave rahi melahi, e na ô atura ratou e taua atoa melahi ra: “Ia faahanahanahia te Atua i te raˈi teitei e ia tupu te hau i te fenua nei no te taata ta te Atua e farii.”—Luka 2:10-14.

I to te mau melahi faarueraa mai ia ratou, na ô aˈera te mau tiai mamoe te tahi i te tahi: “Mai haere anaˈe i Betelehema e hiˈo i te ohipa i tupu, ta Iehova hoi i faaite mai ia tatou.” (Luka 2:15) Haere oioi atura ratou e itea maira ia ratou te aiû ra o Iesu i te vahi iho â ta te melahi i parau ia ratou. I to te mau tiai mamoe faatiaraa i ta te melahi i parau, maere ihora te taata atoa e faaroo ra. O Maria râ, ua tapea maite ïa i teie mau parau atoa e ua feruriruri i te auraa o te reira i roto i to ˈna aau.

I teie mahana, mea rahi te tiaturi ra e ua fanauhia Iesu i te 25 no Titema. Teie râ, na Betelehema, mea ûa e mea toˈetoˈe i Titema. I te tahi taime, e topa atoa te hiona. I taua avaˈe ra, eita ïa e itehia te mau tiai mamoe i rapae i te po taatoa e ta ratou mau mamoe. Eita atoa ïa te emepera Roma e faaue i te taata tei hinaaro ê na hoi e orure hau ia ˈna e haere ehia mahana e tapao i to ratou iˈoa e mea toˈetoˈe roa hoi. Ua fanauhia ïa Iesu i te hoê tau mahanahana aˈe, i Atopa.