Nagsugo an emperador han Imperyo han Roma nga hi Cesar Agusto nga an ngatanan kinahanglan magparehistro. Salit nagbiyahe hi Jose upod hi Maria ngadto ha syudad nga iya natawohan, an syudad han Betlehem, ha sur han Jerusalem.

Damu nga tawo an aadto ha Betlehem para magparehistro. Waray na iba nga mauukyan hira Jose ngan Maria kondi ha kwadra, diin aadto an mga asno ngan iba pa nga hayop. Didto natawo hi Jesus. Ginputos hiya ni Maria hin lampin ngan ginpahigda ha sabsaban, an tubongan han mga hayop.

Sigurado nga ginmaniobra han Dios nga himoon ni Cesar Agusto ito nga balaud. Kay ano? Kay tungod hito nagin posible nga matawo hi Jesus ha Betlehem, an tuna nga natawohan han iya kaapoy-apoyan nga hi Hadi David. Maiha na nga igintagna han Kasuratan nga dida hito nga syudad matatawo an iginsaad nga Hadi.—Mika 5:2.

Importante gud ini nga gab-i! Ha kapatagan, naglamrag an palibot han usa nga grupo han mga paraataman hin karnero. Ito nga lamrag himaya ni Jehova! Usa han mga anghel han Dios an nagsiring ha ira: “Ayaw kamo kahadlok! kay iginpapasamwak ko ha iyo an maopay nga sumat nga makakalipay gud ha ngatanan nga tawo, tungod kay natawo yana ha syudad ni David an iyo Paratalwas, an Kristo nga Ginoo. Ngan ini an pangirilal-an niyo ha iya: Makakakita kamo hin minasus-an nga ginputos hin lampin ngan nahigda ha sabsaban.” Tigda nga nagpakita an damu pa nga anghel ngan nagsiring: “Pagdayawon an Dios ha kahitas-an, ngan ha tuna kamurayawan para ha mga tawo nga iya nalilipayan.”—Lucas 2:10-14.

Pagbaya han mga anghel, nag-iristorya an mga paraataman hin karnero: “Kadto dayon kita ha Betlehem, ngan kitaon naton ini nga hitabo nga iginpahibaro ha aton ni Jehova.” (Lucas 2:15) Kumadto dayon hira ngan nabilngan an minasus-an nga hi Jesus ha lugar nga igintutdo han anghel. Han iginsumat han mga paraataman hin karnero an ginsiring han anghel, nahipausa an ngatanan nga nakabati. Gintipigan ni Maria ito ngatanan nga sumat, ngan ginpamalandong niya an kahulogan hito.

Damu yana an natoo nga natawo hi Jesus han Disyembre 25. Pero mauran ngan mahagkot ha Betlehem kon Disyembre. Usahay nauran pa ngani hin niebe. Salit hito nga bulan, diri gud magpapabilin ha gawas an mga paraataman hin karnero basi magbantay ha panon ha bug-os nga gab-i. Diri liwat oobligaron han emperador han Roma an mga tawo nga karuyag na ngani magrebelde ha iya nga magbiyahe hin pipira ka adlaw ha matugnaw nga panahon basi magparehistro. Matin-aw, natawo hi Jesus han Oktubre.