César Augusto, u emperadoril Romaeʼ, tu yaʼaleʼ tuláakal le máakoʼoboʼ kʼaʼabéet u binoʼob utiaʼal ka tsʼíibtaʼak u kʼaabaʼob. Le oʼolal José yéetel Maríaeʼ binoʼob tu kaajil Belén, le yaan tu noojol Jerusalén, utiaʼal ka tsʼíibtaʼak u kʼaabaʼoboʼ.

Yaʼab máakoʼob binoʼob Belén utiaʼal ka tsʼíibtaʼak u kʼaabaʼob. Le oʼolal le ka kʼuch José yéetel Maríaeʼ chéen tuʼux ku tséentaʼal burroʼob yéetel uláakʼ baʼalcheʼob anchaj utiaʼal u pʼáatloʼob. Teʼeloʼ tiʼ síij Jesusiʼ. Ka báatsʼtepʼtaʼab tumen Maríaeʼ ka tu chikúuntaj teʼ tuʼux ku tsʼaʼabal u yoʼoch le baʼalcheʼoboʼ.

Dioseʼ tu péeksaj César Augusto utiaʼal u yaʼalik ka xiʼik le máakoʼob utiaʼal ka tsʼíibtaʼak u kʼaabaʼoboʼ. ¿Baʼaxten k-aʼalik beyoʼ? Tumen beyoʼ páajchaj u síijil Jesús tu kaajil Belén, u kaajal rey David, u yúuchben chʼiʼibal. Desde úuchjeakileʼ le Kiliʼich Tsʼíiboʼoboʼ u yaʼalmiliʼeʼ tu kaajil Belén kun síijil le Máax kun gobernaroʼ (Miqueas 5:2).

Tuukulnen tiʼ le baʼaxoʼob úuch teʼ áakʼab jeʼeloʼ. Teʼ kʼáaxoʼ juulnaj junpʼéel sáasil teʼ tuʼux yaan junjaats j-kanan tamanoʼoboʼ. Tu yiloʼob u nojbeʼenil Jéeoba. Juntúul u ángel Dioseʼ tu yaʼalaj tiʼ le j-kanan tamanoʼoboʼ: «Maʼ a chʼaʼikeʼex saajkil, tumen ¡ileʼex!, táan in taasikteʼex u maʼalob péektsilil junpʼéel nojoch kiʼimak óolal kun yantal tiʼ tuláakal le kaajoʼ, tumen bejlaʼeʼ, tu kaajal Davideʼ, tsʼoʼok u síijil juntúul a Salvadoreʼex, Cristo le Yuumtsiloʼ. Lelaʼ letiʼe chíikulal kun meyajteʼexaʼ: Yaan a wilkeʼex juntúul chaambal báatsʼtepʼtaʼan yéetel nookʼ, chikúuntaʼan teʼ tuʼux ku tsʼaʼabal u yoʼoch le baʼalcheʼoboʼ». Ka téek chíikpaj u maasil angeloʼob ka joʼopʼ u yaʼalikoʼob: «Nojbeʼenkúuntaʼak Dios teʼ kaʼanoʼ, yéetel teʼ Luʼumaʼ yanak jeetsʼelil ichil le máakoʼob ku lúubloʼob utsil tiʼ Diosoʼ» (Lucas 2:10-14).

Le ka bin le angeloʼoboʼ, le j-kanan tamanoʼoboʼ tu yaʼaloʼob: «Koʼoneʼex túun tak tu kaajil Belén, ka k-il le baʼax tsʼoʼok u yúuchloʼ, le baʼax tsʼaʼab k-ojéelt tumen Jéeobaoʼ» (Lucas 2:15). Ka binoʼob tu séebaʼanil, letiʼobeʼ tu yiloʼob Jesús le táant u síijil jach jeʼex aʼalaʼabiktiʼob tumen le angeloʼ. Ka joʼopʼ u tsikbaltik le j-kanan tamanoʼob le baʼax aʼalaʼabtiʼob tumen le angeloʼ, jaʼakʼ u yóol le máaxoʼob uʼuyoʼ. Maríaeʼ joʼopʼ u tsʼáaik ichil u puksiʼikʼal le baʼaloʼobaʼ yéetel joʼopʼ u tuukul tiʼ baʼax u kʼáat u yaʼaloʼob.

Yaʼab máakoʼob bejlaʼeʼ ku creertikoʼobeʼ Jesuseʼ síij tu kʼiinil 25 tiʼ diciembre. Baʼaleʼ tu kaajil Beleneʼ jach ku beetik keʼel yéetel ku kʼáaxal jaʼ tu mesil diciembre, tsʼoʼoleʼ yaan kʼiineʼ ku kʼáaxal tak nieveiʼ. Teʼ kʼiinoʼob beyoʼ, le j-kanan tamanoʼoboʼ maʼ tu máanskoʼob áakʼab teʼ kʼáax yéetel u yaalakʼoʼoboʼ. Tsʼoʼoleʼ u emperadoril Roma xaneʼ maʼ tu yaʼalik tiʼ le máakoʼob óoliʼ u tsʼaamubaʼob tu contra ka xiʼikoʼob u tsʼíibt u kʼaabaʼob tu kʼiiniloʼob keʼel. Maʼ xaaneʼ Jesuseʼ síij tu yookbal u mesil octubre.