Joseph ye Mary ẹsụk ẹdu ke Bethlehem, inyọn̄ke ika Nazareth kan̄a. Ke ini Jesus esịmde usen itiaita, mmọ ẹnịm enye mbobi nte Ibet oro Abasi ọkọnọde nditọ Israel etemede. (Leviticus 12:2, 3) Edi ido ke edem mmọ ndisio eyen erenowo enyịn̄ ke usen emi n̄ko. Mmọ ẹsio eyen mmọ Jesus, kpa enyịn̄ emi angel Gabriel ọkọdọhọde ẹsio enye.

Ọfiọn̄ kiet ye usen ifan̄ ẹbe, ndien Jesus ọyọhọ usen 40. M̀mọ̀n̄ ke ete ye eka esie ẹda enye ẹka? Mmọ ẹda enye ẹka temple Jehovah ke Jerusalem. To ke ebiet emi mmọ ẹdude sịm temple edi itiat ifan̄ kpọt. Ibet ọdọhọ ete usen 40 ama ebe toto ke usen emi eyen erenowo amanade, yak eka esie emen enye aka temple akawa uwa man mmọ mbiba ẹsana.—Leviticus 12:4-8.

Mary anam oro. Enye ọnọ n̄kpri inuen iba. Oro anam nnyịn ifiọk ke Joseph ye Mary ẹdi ubuene. Ibet ọkọdọhọ yak ẹwa eyenerọn̄ ye inuen kiet. Edi edieke eka mîkemeke ndinọ erọn̄, ke enye ekeme ndinọ mbomon̄kuku iba m̀mê ibiom iba. Sia Mary edide ubuene, enye ọnọ n̄kpri inuen iba.

Akanieren kiet asan̄a ekpere mmọ ke temple. Enye ekere Simeon. Jehovah ama ayarade ọnọ enye ke mbemiso enye akpade, ke enye oyokụt Christ m̀mê Messiah oro imọ ikọn̄wọn̄ọde. Edisana spirit anam Simeon aka temple usen oro, ndien enye okokụt Joseph ye Mary ye nsekeyen mmọ. Simeon ọbọ eyen oro akama.

Ke ini Simeon osụk akamade Jesus enye ọtọn̄ọ ndikọm Abasi ete: “Ke emi, Akakan Ọbọn̄ Andikara, afo amayak ofụn fo ọnyọn̄ ke ifụre nte afo ọkọdọhọde; koro enyịn mi omokụt usụn̄ eke afo adade ọnọ edinyan̄a emi afo enịmde ke iso kpukpru mme idụt, kpa un̄wana ndifụhọde ufụhọn̄kpọ mfep ke iso mme idụt ye ubọn̄ ikọt fo Israel.”—Luke 2:29-32.

Idem akpa Joseph ye Mary ndikop n̄kpọ emi. Simeon ọdiọn̄ mmọ onyụn̄ ọdọhọ Mary ke “ẹnịm [eyen esie] man ediwak owo ẹduọn̄ọ ke Israel ẹnyụn̄ ẹfiak ẹdaha ẹda,” ye nte ke enye oyofụhọ nte n̄kpọ emi ẹdade akan̄kan̄ ẹkịm enye.—Luke 2:34.

Owo en̄wen emi odude ke temple usen oro edi Anna, prọfet an̄wan emi edide isua 84. Bible ọdọhọ ke akananam Anna itreke ndidu ke temple. Kpa idaha oro enye asan̄a ekpere Joseph, Mary, ye Jesus, onyụn̄ ọtọn̄ọ ndikọm Abasi nnyụn̄ ntịn̄ mban̄a eyen emi nnọ kpukpru owo emi ẹyomde ndikop.

Esịt enen̄ede enem Joseph ye Mary ndikop kpukpru se mme owo ẹtịn̄de ẹban̄a eyen mmọ ke temple. Ke akpanikọ, kpukpru emi owụt mmọ ke eyen mmọ edi Enye Emi Abasi Ọkọn̄wọn̄ọde.