Josep enggau Maria diau ba Betlehem lalu enda pulai ke Nasaret. Lebuh anak nya beumur lapan hari, iya pan disunat nitihka Adat ke diberi Petara ngagai orang Israel. (Adat Lewi 12:2, 3) Lalu biasa iya, anak lelaki mega diberi nama ba hari nya. Nya alai, Josep enggau Maria meri nama Jesus ngagai anak seduai iya, baka ke diasuh melikat Gabriel.

Empat puluh hari pengudah Jesus ada, apai indai iya mai iya ngagai Rumah Sembiang. Adat Jehovah madahka, empat puluh hari pengudah siku indu ngadaka anak lelaki, iya patut datai ngagai Rumah Sembiang meri pemeri ngambika ulih nuchi diri.—Adat Lewi 12:4-8.

Adat Jehovah mega madahka, indu nya patut mai siku anak domba enggau siku burung nyadika pemeri. Tang enti iya enda ulih meri pemeri nya, iya ulih meri sepasang burung kukur tauka dua iku burung achang. Nyadi, Maria mai dua iku burung ti agi biak nyadika pemeri. Tu nunjukka, Josep enggau Maria ukai orang kaya.

Ba Rumah Sembiang, siku lelaki ke udah tuai betemu enggau Josep seduai Maria. Lelaki nya benama Simion. Petara udah madah ngagai iya, iya enda mati seagi-agi iya bedau meda Kristus, tauka Messiah, ke dikirum Jehovah. Ba hari nya, kuasa kudus ngiring Simion ngagai Rumah Sembiang. Ba dia, Simion betemu enggau Josep seduai Maria sereta Jesus ke agi mit.

Simion merap Jesus lalu muji Petara. Ku iya: “Tuan ti Pemadu Tinggi, diatu ulun nuan ulih mati enggau lantang, laban baka ke dipadahka Nuan, mata aku udah meda penyelamat, ke udah disediaka Nuan ba mua semua orang. Iya meh penampak ke muai pemetang ti malut orang bansa bukai, lalu iya mega deka mai mulia ngagai nembiak Nuan, Israel.”—Luke 2:29-32.

Josep enggau Maria berasai alit ati ninga utai ke dipadahka Simion pasal anak seduai iya. Simion mega merekatka seduai iya lalu bejaku ngagai Maria: “Ketegal anak tu, mayuh orang Israel deka labuh, lalu mayuh mega ke deka angkat baru.” Ketegal nya, ati Maria deka balat tusah asaika direjang ngena pedang.—Luke 2:34.

Ba hari ti sama, siku nabi indu ke benama Anna ti beumur 84 taun mega bisi dia. Iya seruran datai ngagai Rumah Sembiang. Maya nya, iya datai betemu enggau Josep, Maria sereta  Jesus, lalu meri terima kasih ngagai Petara. Iya mega bejaku pasal Jesus ngagai semua orang ke deka ninga.

Gambarka pengaga ati Josep seduai Maria pasal utai ke udah nyadi ba Rumah Sembiang! Semua utai ke nyadi tu ngasuh sida andal, anak sida nya endang Messiah ke Disemaya Petara.