Jesús nacekusqantawan, Josewan Mariawanqa Belenpi qhepakorqanku, nitaj Nazaretman kuterqankuchu. Ley nisqanman jina, israelitasqa qhari wawitasta nacekusqankumanta pusaj diasninman circuncidaj kanku (Levítico 12:2, 3). Chay diallataj wawitankuman sutita churaj kanku. Josewan Mariawanqa chay Leyta kasukuspa wawitankuta circuncidarqanku, ángel Gabriel nisqanman jinataj, Jesús sutita churarqanku.

Jesús 40 diasninta juntʼasqantawan, Josewan Mariawanqa payta Jerusalén temploman aparqanku. Jerusalentaj Belén llajta qayllapi kasharqa. ¿Imaraykutaj Jesusta temploman aparqanku? Diospa Leyninpeqa qhari wawitata nacechikoj warmispaj uj kamachiy karqa. Chay kamachiyman jinataj, warmisqa qhari wawitanku 40 diasninta juntʼasqantawan uj jaywanata Diospa templonman apananku karqa. Ajinamanta Diospa ñaupaqenpi llimphu kanankupaj (Levítico 12:4-8).

Chantapis tukuy israelita warmisqa, wawitata nacechikuspa uj corderota, uj pʼisqotawan Diospa templonman apananku karqa. Wajcha kasparí, iskay jurkʼutitasta chayri iskay paloma irpasta apananku karqa. Mariatajrí Diosman jaywananpaj iskay pʼisqetusta aparqa. Ajinapi reparanchej Mariaqa pobre kasqanta.

Josewan Mariawan templopi kashajtinku, Simeón paykunaman chimparqa. Payqa machituña karqa, chay diataj Diospa atiynin temploman pusasqa. Diosqa ñaupajtaña Simeonman willasqa, manaraj wañupushaspa kachamusqan Cristota chayri Mesiasta rikunanta. Chantá Simeonqa Jesusta ichurikorqa.

Wawitata japʼishaspataj, Diosman ajinata agradecekorqa: “Tukuyta Kamachej Señor, kunanqa kay wawata rikushani niwasqaykiman jina, chayrayku kusisqa wañupuyta atiyman. Ñawisneyqa rikunña pichus salvacionta apamonqa, chayta. Chaytaqa tukuy llajtaspa rikunanta wakichinki, payqa kʼanchay kanqa, tukuy runas rikuyta atinankupaj, Israel llajtaykitapis pataman oqharenqa”, nispa (Lucas 2:29-32).

Josewan Mariawanqa, mayta tʼukorqanku chayta uyarispa. Chantá Simeonqa paykunata bendicerqa, Mariamantaj nerqa: “Kay wawataqa Dios churan Israelpi ashkhas urmanankupaj, jatarinankupajtaj”, nispa. Chantá nillarqataj: “María, llakeyqa sonqoykita jatun espada jina tʼojsenqa”, nispa (Lucas 2:34).

Chay ratollataj Ana sutiyoj awelita paykunaman chimpaykorqa. Payqa Diospa  profetan karqa. Anaqa 84 watasniyojña kaspapis, Diospa templonman sapa día rillajpuni. Payqa Jesusta rikuytawan Diosman graciasta qorqa. Chantá templopi Jesusmanta willayta qallarerqa.

Josewan Mariawanqa tukuy chay imasta uyarispa, maytachá kusikorqanku. Chaywanqa aswan sutʼita yacharqanku, wawitankoqa Diospa Wawanpuni kasqanta.