Ne seki ‵foki atu a Iosefa mo Malia ki Nasaleta, kae ne ‵nofo loa lāua i Peteleema. I te taimi ko valu ei aso o Iesu, ne ave ne lāua a ia ke pilitome, pelā eiloa mo te fakatonuga i te Tulafono a te Atua ki te kau Isalaelu. (Levitiko 12:2, 3) Se faifaiga masani foki ke fakaigoa a tama‵liki tāgata i te aso tenā. Ne fakaigoa ne lāua te lā tamaliki tagata ki a Iesu, e pelā mo te mea ne fakatonu atu ne te agelu ko Kapilielu.

E tasi tupu te masina ko teka atu, kae ko 40 aso te matua o Iesu. Tefea nei te koga ne ave a ia ki ei ne ana mātua? Ki te faletapu i Ielusalema, telā e tu i nai maila te ‵mao mai te koga telā e ‵nofo ei latou. E fai mai te Tulafono me i te 40 aso mai tua ifo o te taimi ne fanau mai ei se tamaliki tagata, e ‵tau o avatu ne te mātua se meaalofa o te faka‵māga ki te faletapu.—Levitiko 12:4-7.

Ne fai ne Malia te mea tenā. I te faiga o tena meaalofa, ne avatu ne ia se avā manu eva fo‵liki. E fakaasi mai ne te mea tenei se mea e uiga ki te tulaga o Iosefa mo Malia i mea tau tupe. E ‵tusa mo te Tulafono, e ‵tau o ofo atu se tamā mamoe tagata mo se manu eva. Kae kafai e se ‵kafi ne te mātua o ‵togi te mea tenā, ko lava loa i se avā lupe io me se avā punuā lupe. Tenā eiloa te tulaga o Malia mo mea ne ofo atu ne ia.

I te faletapu ne fanatu se toeaina ki a Iosefa mo Malia. Tena igoa ko Simeona. Ne fakaasi atu ne te Atua ki a ia me ka lavea ne ia a te Keliso io me ko te Mesia telā ne folafola mai ne Ieova, a koi tuai o mate atu a ia. I te aso tenei, ne takitaki atu a Simeona ne te agaga tapu ki te faletapu, telā ne maua atu ne ia i konā a Iosefa mo Malia mo te lā pepe. Ne apai aka ne Simeona a te pepe ki ana lima.

I te taimi koi taofi ei ne ia a Iesu, ne fakafetai atu a Simeona ki te Atua, ana muna: “Nei la, te Aliki Sili, ko fakasaoloto ne koe tau pologa ke fano mo te filemu e ‵tusa eiloa mo tau folafolaga me ko oti ne lavea ki oku mata a te tino ka aumai ne ia te fakaolataga telā ne fakatoka ne koe i mua o tino katoa, se mainaga ke tapale ei keatea a te veli o te pouliga mai atufenua kae e se ‵malu tenā ki ou tino Isalaelu.”—Luka 2:29-32.

Ne ōfo malosi a Iosefa mo Malia i te taimi ne lagona ei ne lāua a te mea tenei. Ne fakamanuia atu a Simeona ki a lāua, kae ne fai atu ki a Malia me i “te tamaliki tenei ko te pogai e ‵siga kae toe ‵tu aka ei a tino e tokouke i Isalaelu” kae ka ‵suki atu eiloa ki te loto o tou fafine se pelu mata ‵kai telā e fakatusa ki te fanoanoa.—Luka 2:34.

Ne nofo atu foki i konā se isi tino i te aso tenā. Ko te pelofeta fafine ko Ana, telā ko 84 ana tausaga. A te ‵tonuga loa, e se mafai eiloa o galo tou fafine mai te faletapu. I te itula eiloa tenei, ne fanatu a ia ki a Iosefa, Malia, mo te pepe ko Iesu. Ne kamata o fakafetai atu a Ana ki te Atua kae ne faipati atu foki e uiga ki a Iesu ki tino katoa kolā ne fia fakalogo‵logo atu ki a ia.

E mafai o fakaataata ne koe a te lasi o te fia‵fia o Iosefa mo Malia ki mea kolā ne ‵tupu i te faletapu! A te ‵tonuga loa, e fakamaoni atu ne mea katoa konei ki a lāua me i te lā tamaliki tagata ko te Tino a te Atua telā ne Folafola Mai.