Yesu wa ngɛ Nazaret ma nyafii nɛ nihi bui ɔ mi. Ma nɛ ɔ ngɛ Yudea yiti je ngɛ Galilea wo ɔ pusinɔ he.

Eko ɔ, Yesu ye jeha enyɔ benɛ Yosef kɛ Maria ngɔ lɛ kɛ je Egipt kɛ ba hi ma nɛ ɔ mi ɔ. E maa pee kaa jamɛ a be ɔ mi ɔ, lɛ pɛ ji a bi. Se pee se ɔ, Yosef kɛ Maria ba fɔ Yakobo, Yosef, Simon, kɛ Yuda, nɛ a ji Yesu nyɛ bimɛ. Yosef kɛ Maria fɔ yihi hulɔ. Lɔ ɔ he ɔ, ke e hí kulaa a, Yesu ngɛ senihi ekpa.

Yesu ngɛ weku li kpahi hulɔ. Wa le Elizabet kɛ e bi Yohane momo. A ngɛ Galilea dɔ si je tsitsaa ngɛ Yudea. Maria nyɛmiyo Salome hu ngɛ Galilea ngɛ a kasa nya. Salome huno ji Zebedeo. A bimɛ Yakobo kɛ Yohane ba peeɔ Yesu nyɛwayo loo nyɛngua bimɛ. Wa li kaa eko ɔ, Yesu kɛ mɛ bɔ wawɛɛ ngɛ a jokuɛwi a si, se pee se nɛ a ba plɛ e kaseli ɔ, Yesu kɛ mɛ bɔ gbagbanii.

Kapitɛ ji Yosef, nɛ e biɔ nɛ e tsu ní wawɛɛ konɛ e nyɛ nɛ e hyɛ e weku ɔ nɔ. Yosef tsɔse Yesu kaa lɛ nitsɛ e bi, enɛ ɔ he ɔ, a tsɛ Yesu ke “kapitɛ ɔ bi.” (Mateo 13:55) Yosef tsɔɔ Yesu kapitɛ ní tsumi ɔ, nɛ Yesu ba le ní tsumi ɔ saminya. Pee se ɔ, nihi de ngɛ Yesu he ke: “Kapitɛ ɔ ji nɛ ɔ” nɛ.​​—Marko 6:3.

 Yehowa jami ji nɔ́ titli nɛ e he hia Yosef kɛ e weku ɔ. Yosef kɛ Maria a tsɔɔ a bimɛ ɔmɛ Mawu Mlaa a ‘be nɛ a ngɛ we mi, be nɛ a hia blɔ, be nɛ a hwɔɔ si, kɛ be nɛ a te si.’ (5 Mose 6:6-9) Kpe he ko ngɛ Nazaret. Atsinyɛ jemi ko be he kaa Yosef kɛ e weku ɔ ya jaa Mawu ngɛ lejɛ ɔ. Pee se ɔ, a de ngɛ Yesu he kaa, e ya kpe he ɔ ‘kaa bɔ nɛ e pɔɔ peemi ngɛ Hejɔɔmi Ligbi’ ɔ nɔ ɔ. (Luka 4:16) Jehanɛ hu ɔ, Yosef kɛ e weku ɔ kɛ bua jɔmi hiaa blɔ kɛ yaa Yehowa sɔlemi we ɔ ngɛ Yerusalem.