Yesu ubedongo i Nazareti, adhura ma nyanok, ma pire yik ungo. Adhurane nwang’ere yo malu, i ng’om gudi ma julwong’o Galilaya, etie yo reto pa Nam Galilaya.

Ecicopere nia Yesu ubino ku oro ario kinde ma Yosefu ku Maria gidwogo kude niai i Misiri. Ve nia saa maeno nwang’u fodi Yosefu ku Maria ginyolo ngo awiya mange. Ing’eye, Maria udok unyolo awiya mange ma co ku Yosefu, awiyane tie Yakobo, Yosefu, Simon, man Yuda. Ginyolo bende awiya mange ma nyir. Andha, Yesu ubino kud awiya pagi ma co ku ma nyir ma romo abusiel.

M’umbe jiji, Yesu ubino ku wedi pare mange bende. Wadaru ng’eyo pir Elisabeti ku Yohana ma wode. Gibino nikwo yo piny i Yahudi, i kilometre ma lee. Salome ma ve utie nyamin Maria man nyamin min Yesu ke, ubino nikwo ceng’ini ku Galilaya. Nying’ won ot pare ubino Zebedayo. Gibino kud awiya ario ma nying’gi bino, Yohana man Yakobo, ve gibino umaru ma kwong’a pa Yesu. Wang’eyo ngo saa moko nyo kinde ma gibedongo, Yesu ubed utuko kugi, re ing’eye gitimo tic mi rweyo lembanyong’a kude man gin ario ceke gidoko jukwenda pare.

Yosefu ucikere nitimo tic matek pi nipong’o yeny mi juruot pare ma dong’ welgi umedere. Ebino jabodho mi bau. Etungo Yesu ve wode ma dhe, uketho julwong’o Yesu, “wod jabodho mi  bau.” (Matayo 13:55) Yosefu uponjo Yesu bende ku tic mi gobo bau, man eng’eyo tije cuu. Uketho ingeye dhanu uyero pi Yesu kumae: “Maeni jabodho mi bau.”​—Marko 6:3.

Timo thier ni Yehova ubino gin ma kwong’a i kwo mi juruot pa Yosefu. Yosefu ku Maria giponjo awiya migi ku lembe mi tipo ‘kinde ma gibedo i ot migi, kinde ma gibewotho i yo, kinde ma gibevuto piny, man kinde ma gibeai malu,’ kara gimediri niworo Cik pa Mungu. (Poi mi Cik 6:6-9) Kacokiri ubino nuti i Nazareti. M’umbe jiji Yosefu ubed utero juruot pare kakeca pi nitimo thier ni Yehova. Ing’eye, Biblia uyero nia Yesu ubed ucidho “i kacokiri i ceng’ sabatu, calu kurane.” (Luka 4:16) Wotho mi cidho i hekalu pa Yehova i Yerusalem ubed umio anyong’a ma lee ni juruot pa Yosefu.