Di Nasaret do Jesus magodang. Gelleng do kota Nasaret martimbangkon angka kota na asing. Di sabola utara ni Judea do kota on, di inganan na mardolok-dolok na margoar Galilea, di sabola barat ni tao na balga na margoar Laut Galilea.

Ra, dua taon ma umur ni Jesus tingki diboan ibana sian Mesir. Holan ibana dope anak ni si Josep dohot si Maria tingki i. Alai ndang sadia leleng tubu ma angka anggina, i ma si Jakobus, si Josep, si Simon, dohot si Judas. Jala adong do angka ibotona. Sian on taboto ma, ra adong do hira-hira onom anggi dohot iboto ni Jesus.

Asing ni i, adong dope angka keluarga ni Jesus na asing. Nunga dipaboa tu hita taringot tu si Elisabet dohot anakna, si Johannes. Di Judea do nasida maringanan, dao sian Nasaret. Alai tading di Galilea do inang uda ni Jesus, i ma si Salome dohot tunggane dolina si Sebedeus. Anggi ni si Maria do si Salome. Jala adong do dua ianakhonna, i ma si Jakobus dohot si Johannes. Ndang adong dipaboa na rap do nasida manang ndang tingki gelleng. Alai dung magodang, solhot do parale-aleon ni nasida jala gabe apostel ni Jesus do nasida na dua.

Ingkon ringgas do si Josep asa boi manarihon  keluargana. Tukang hau do ibana. Dibahen ibana do Jesus songon anakna sandiri. Alani i do Jesus digoari “anak ni tukang hau”. (Mateus 13:55) Diajari si Josep do Jesus martukang, jala burju do Jesus marsiajar. Alani i do didok halak Jesus “tukang hau”.​—Markus 6:3.

Togu do haporseaon ni keluarga ni si Josep tu Jahowa. Diihuthon si Josep dohot si Maria do Patik ni Debata. Diajarhon nasida do taringot tu Debata tu ianakhonna tingki ‘hundul-hundul di jabu, tingki di pardalanan, tingki modom, nang dung hehe’. (5 Musa 6:6-9) Adong do sinagoga di Nasaret. Tontu, ringgas do si Josep mamboan anakkonna tusi. Ai didok do, laho do Jesus tu sinagoga “songon na somal diulahon ibana di ari Sabbat”. (Lukas 4:16) Jala las do roha ni nasida ganup taon laho tu bagas joro di Jerusalem.