Jesus okpon ke Nazareth, ekpri obio emi mîwọrọke etop. Nazareth odu ke enyọn̄-enyọn̄ Galilee, ke n̄kan̄ emi etiede obot obot onyụn̄ ekperede Inyan̄ Galilee.

Etie nte Jesus ekedi isua iba ke ini Joseph ye Mary ẹmende enye ke Egypt ẹdi mi. Etie nte enye ikpọn̄ ke mmọ ẹkenyene ini oro. Edi idahaemi, Jesus enyene nditọeka. Enyịn̄ nditọeka esie ẹdi James, Joseph, Simon, ye Judas. Joseph ye Mary ẹnyene nditọiban n̄ko. Ke nditịm ntịn̄, nditọeka Jesus ẹyọhọ owo itiokiet.

Jesus enyene iman n̄ko. N̄kọ ke eteti Elizabeth ye John eyen esie. Mmọ ẹdụn̄ ko ke usụk usụk Judea. Owo emi odụn̄de ekpere mmọ ke Galilee edi Salome emi edide eyeneka Mary, eka Jesus. Ebe Salome ekere Zebedee, nditọ mmọ iba ẹkere James ye John. Bible itịn̄ke m̀mê Jesus ama enen̄ede ekpere owo iba emi ke ini enye ekedide ekpri. Edi nte ini akade, mmọ ẹma ẹnen̄ede ẹkpere Jesus ẹnyụn̄ ẹkabade ẹdi mme apostle esie.

Joseph esịn idem anam utom man ese aban̄a ubon esie. Enye edi anamusọ eto. Joseph akama Jesus nte ata eyen esie, ntre mme owo ẹsikot Jesus “eyen anamusọ eto.” (Matthew 13:55) Joseph ekpep Jesus utom esie, ndien Jesus ọfiọk utom etieti. Oro anam mme owo ẹkot Jesus “anamusọ eto.”—Mark 6:3.

 Joseph ye ubon esie ẹsituak ibuot ẹnọ Jehovah. Joseph ye Mary ẹnam se Ibet Abasi ọdọhọde mme ete ye eka ẹsinam. Mmọ ẹsikpep nditọ mmọ Ikọ Abasi ‘ke ini mmọ ẹtiede ke ufọk ye ke ini mmọ ẹsan̄ade ke usụn̄ ye ke ini mmọ ẹnade-na ye ke ini mmọ ẹdahade ẹda.’ (Deuteronomy 6:6-9) Synagogue odu ke Nazareth. Imenịm ke Joseph esisan̄a ye n̄wan ye nditọ esie aka do akatuak ibuot ọnọ Abasi. Bible ọdọhọ ke ekedi ido Jesus n̄ko ndisika synagogue ke usen Sabbath. (Luke 4:16) Esinyụn̄ enem mmọ ndika temple Jehovah ke Jerusalem kpukpru isua n̄katuak ibuot nnọ Abasi.