Jesus dibesaika ba Nasaret, siti nengeri ti mit di Galili, ba begian utara menua Judea. Ba begian timur nengeri Nasaret, bisi danau ti besai ke dikumbai Danau Galili.

Lebuh Jesus beumur kira-kira dua taun, Josep enggau Maria pindah ari Ejip ngagai Nasaret. Maya nya, sida bedau bisi anak ke bukai. Tang udah nya, Jesus bisi beberapa iku menyadi tiri lelaki ke benama James, Josep, Simon, enggau Judas. Jesus mega bisi beberapa iku menyadi tiri ke indu. Nya alai, Jesus bisi abis kurang enam iku menyadi lelaki enggau indu.

Jesus mega bisi kaban belayan ke bukai. Ibu iya, Elisabet, lalu petunggal iya, John diau ba Judea. Jesus mega bisi siku agi ibu ke benama Salomi. Salomi nya menyadi Maria. Laki Salomi nya Sebedi, lalu seduai iya bisi dua iku anak lelaki, iya nya James enggau John. Kitai enda nemu sekalika Jesus mayuh begulai enggau dua iku petunggal iya, James enggau John lebuh sida agi mit. Tang nyau kelama, seduai iya nyadi rasul Jesus, lalu bisi kaul ti rapat enggau iya.

Josep nya siku tukang kayu. Iya bagas gawa ngambika sida sebilik bisi utai ke diguna. Iya ngemesaika Jesus baka anak iya empu. Nya alai, Jesus dikumbai “anak tukang kayu.” (Matthew 13:55) Josep mega ngajar Jesus betukang,  lalu nyau kelama Jesus dikumbai “tukang kayu.”—Mark 6:3.

Josep enggau sida sebilik ngenuluka pengawa sembah ngagai Jehovah. Josep enggau Maria ngasika Adat Petara. Ketegal nya, sida ngajar bala anak sida pasal Adat Petara ‘lebuh sida di rumah, enggau lebuh sida bejalai kebukai, lebuh sida belelak, enggau lebuh sida gawa.’ (Ulang Adat 6:6-9) Ba Nasaret, bisi Rumah Sembiang. Lalu Josep tentu selalu mai ruang bilik iya nyembah Petara ba dia. Nya meh kebuah Bup Kudus madahka, Jesus ngagai Rumah Sembiang “baka ke suah digaga iya maya Hari Sabat.” (Luke 4:16) Sida sebilik mega rindu ngagai rumah sembiang Jehovah ba Jerusalem.