Yesũ nĩwaendeeie kwĩana e ndũanĩ nini ya Nasaleti. Ndũa ĩsu yaĩ kĩsionĩ kĩ iĩma kĩtawa Kalilii, ngalĩko ya ũthũĩlonĩ wa syũa ya Ũkanga wa Kalilii.

Nĩvatonyeka Yesũ akethĩwa aĩ na myaka ĩlĩ yĩla Yosevu na Meli mookie kwĩkala Nasaleti maumĩte Misili. Veonekana kana ĩvindanĩ yĩĩ Yosevu na Meli mayaĩ na kana kangĩ. Ĩndĩ, ĩtina wa ĩvinda Meli nĩwasyaie Yakovo, Yosevu, Simoni, na Yutasi. Yosevu na Meli nĩmasyokie kũsyaa syana ingĩ sya eĩtu. Kwoou, nĩvatonyeka Yesũ akethĩwa aĩ na ainae ta thanthatũ ũu.

Yesũ aĩ na andũ angĩ ma mũsyĩ woo eka o ala wasyaanĩw’e namo. Kwa ngelekany’o, nĩtwĩsĩ Elisavethi na mwana wake, Yoana, ala mekalaa kĩlomita mbingĩ ngalĩko ya ĩtheo ya Yutia, maĩ andũ ma mũsyĩ wa Yesũ. Ũngĩ nĩ Salome, ũla wekalaa Kalilii, na waĩ mwĩĩtu-a-inyia wa Meli, kwoou aĩ ta inyia wa Yesũ. Nake mũũme wa Salome eetawa Sevetii na nĩmo maĩ asyai ma Yakovo na Yoana. Kwoou no twasye kana Yakovo na Yoana maĩ ta ana-a-inyia ma Yesũ. O na kau tũyĩsĩ kana Yesũ nĩwatũmĩie ĩvinda yingĩ vamwe na imwana isu ilĩ me anini, nĩtwĩsĩ kana ĩtina nĩmesie kũtw’ĩka anyanyae make ma vakuvĩ na meethĩwa atũmwa make.

Yosevu aĩ vundi wa mbwaũ na yaĩ no nginya athũkũme wĩa ũsu na kĩthito nĩ kana eanĩsye mavata ma mũsyĩ wake ũla waĩ ũnambĩĩa kũneneva.  Yosevu amũeie Yesũ ta mwana wake, na kwoou eesĩkĩe ta “mwana wa vundi wa mbwaũ.” (Mathayo 13:55) Nĩwamũmanyĩisye Yesũ wĩa wa mbwaũ na aũmanya nesa. Nĩkyo kĩtumi andũ maineena ĩũlũ wa Yesũ maasya: “Ũũ nĩ ũla vundi wa mbwaũ.”—Maliko 6:3.

Ũndũ ũla waĩ wa vata vyũ kwa Yosevu na andũ make waĩ kũmũthaitha Yeova. Nũndũ Yosevu na Meli nĩmaatĩĩaa Mĩao ya Ngai, nĩmamanyĩasya syana syoo maũndũ ma kĩ-veva ‘yĩla mailyĩ nyũmbanĩ yoo, na yĩla maendete nzĩanĩ, na yĩla makomete, na yĩla mookĩla.’ (Kũtũngĩlĩlwa Kwa Mĩao 6:6-9) Vaĩ na ĩsinakoke yaĩ Nasaleti, kwoou nĩtwĩsĩ nesa kana Yosevu nĩwaendaa vamwe na andũ make kĩla ĩvinda kũthaithĩa ĩsinakokenĩ yĩu. Nĩkyo kĩtumi Luka wesie kũandĩka kana “kwosana na ũndũ weekaa mũthenya wa Savato,” Yesũ nĩwaendie ĩsinakokenĩ. (Luka 4:16) O na ĩngĩ, Yosevu vamwe na andũ make nĩmatanĩaa kũthi kĩla ĩvinda ĩkalũnĩ ya Yeova yĩla yaĩ Yelusaleme.