Jesu arakũrĩra taũni-inĩ ĩtarĩ nene ya Nazarethi. Ĩrĩ mwena wa rũgongo, bũrũri-inĩ ũrĩ irĩma gĩcigo-inĩ kĩa Galili, mwena wa ithũĩro wa Iria inene rĩtagwo Galili.

No kũhoteke rĩrĩa Jesu aarĩ na mĩaka ĩĩrĩ, nĩrĩo aarehirũo kuo nĩ Jusufu na Mariamu kuuma Misiri. Kũroneka atĩ gũkinyĩria hĩndĩ ĩyo, matiarĩ na mwana ũngĩ. No thutha ũcio, ariũ a nyina magaciarũo, nĩo Jakubu, Jusufu, Simoni, na Judasi. Ningĩ Jusufu na Mariamu makagĩa na airĩtu aarĩ a nyina na Jesu. Jesu akagĩa na ariũ na aarĩ a nyina matanyihĩire atandatũ.

Jesu arĩ na andũ angĩ a mbarĩ ciao. Nĩ tũmenyete ũhoro wa Elizabethi na mũriũ wake Johana. Maikaraga kilomita nyingĩ mwena wa mũhuro, thĩinĩ wa Judea. Ũrĩa ũikaraga hakuhĩ nao kũu Galili nĩ Salome, na kwahoteka nĩ mwarĩ wa nyina na Mariamu, kwoguo nĩ tata wa Jesu. Mũthuri wa Salome nĩ Zebedi. Ariũ ao erĩ Jakubu na Johana, no merũo nĩ aihwa a Jesu a hakuhĩ. Tũtiũĩ kana Jesu nĩ aahũthagĩra mahinda maingĩ na imwana icio magĩkũra, no thutha-inĩ maacokire gũtuĩka arata a hakuhĩ marĩ atũmwo ake.

No mũhaka Jusufu arute wĩra na kĩyo nĩguo ahingĩrie famĩlĩ yake ĩrĩa ĩrathiĩ ĩnenehete mabataro mayo. Nĩ bundi wa mbaũ. Na ararera Jesu ta mũrũ wake mwene, kwoguo Jesu agetwo “mũrũ wa bundi ũrĩa wa mbaũ.” (Mathayo  13:55) Jusufu agathomithia Jesu gũkorũo arĩ bundi wa mbaũ, na akamenya wĩra. O na thutha-inĩ andũ makoiga ũũ igũrũ rĩgiĩ Jesu: “Githĩ ũyũ ti bundi ũrĩa wa mbaũ?”​—Mariko 6:3.

Famĩlĩ ya Jusufu nĩ ĩkĩrĩire mũno ũthathaiya wa Jehova ũtũũro-inĩ wao. Makĩrũmĩrĩra Watho wa Ngai, Jusufu na Mariamu makahe ciana ciao ũtongoria wa kĩĩroho ‘hĩndĩ ĩrĩa maikarĩte nyũmba yao thĩinĩ, na hĩndĩ ĩrĩa megũthiĩ na njĩra, na hĩndĩ ĩrĩa makomete, o na rĩrĩa mokĩrĩte.’ (Gũcokerithia Maathani 6:​6-9) Nazarethi nĩ kũrĩ na thunagogi. No tũkorũo na ma atĩ Jusufu nĩ atwaraga famĩlĩ yake kaingĩ kuo gũthathaiya Jehova. Thutha-inĩ gũkerũo atĩ “ta ũrĩa aamenyerete gwĩka mũthenya wa Thabatũ,” Jesu agĩthiĩ thunagogi-inĩ. (Luka 4:16) Ningĩ famĩlĩ ya Jusufu nĩ ĩgĩaga na gĩkeno mũno gũthiĩ hekarũ-inĩ ya Jehova o mwaka thĩinĩ wa Jerusalemu.