Yesu wakomejile mu Nazala, muzhi mucheche ye balengulwile ku bantu. Uno muzhi wajinga ku kabeta ka buyeke bwa Yudea, mu kyalo kya mitumba kyatelwanga’mba Ngalilea, ku muzhika wa Kalunga ka Ngalilea.

Yesu byo afikizhe kampe myaka ibiji, ba Yosefwa ne Maliya bamuletele mu muzhi wa Nazala kufuma ku Ijipita. Kyamweka pa kyokya kimye bajingatu na mwana umo. Mu kuya kwa moba, ba Yosefwa ne Maliya basemene Yakoba, Yosefwa, Shimona, Yudasa ne baana babakazhi. Onkao mambo, Yesu wajinga na bankasanji batanu na umo, babalume ne babakazhi.

Yesu wajinga ne na balongo bakwabo. Twayukako kala Elisabeta ne mwananji wamulume Yoano, baikalanga kwalepa ku Yudea. Mu Ngalilea mwaikalanga mwanamukazhi wa jizhina ja Salome. Kyamweka Salome ne Maliya bajinga ba nkasa ne kolo. Salome wasongwelwe kwi Zebede kabiji bajinga na baana babalume babiji, Yakoba ne Yoano. Onkao mambo, bano baana babo babiji bafwainwa bajinga bankasa ne kolo ne Yesu. Kechi twayuka inge kya kuba byo bakijinga banyike bakayilanga pamo ne Yesu nangwa ne. Bino byo bakomene, baikele balunda nanji, kabiji batumwa banji.

Yosefwa waingilanga bingi na ngovu pa kumwena bintu ba mu kisemi kyanji. Wajinga kalipentala. Yosefwa wakomeshe Yesu nobe mwananji wa kwisemena. O ene mambo Yesu o bamutelelanga’mba “mwana kalipentala.” (Mateo 13:55) Yosefwa wafunjishe  Yesu kwikala kalipentala, kabiji Yesu wayukile bingi uno mwingilo. O ene mambo bantu o baambilanga pe Yesu amba, “kalipentala.”—Mako 6:3.

Yosefwa ne kisemi kyanji bapopwelanga Yehoba. Yosefwa ne Maliya balamine Muzhilo wa Lesa waamba’mba bansemi bafwainwa kufunjishanga baana babo mambo a Lesa ‘pa kwikala mu nzubo yabo, pa kwenda mu jishinda, pa kulaala ne pa kubuuka.’ (Mpitulukilo ya mu Mizhilo 6:6-9). Mu Nazala mwajinga nshinagoga kabiji twakonsha kuketekela’mba Yosefwa kimye kyonse wayanga konka pamo na kisemi kyanji na kupopwela Lesa. Onkao mambo, Baibolo waamba’mba kimye kimo Yesu wayile ku nshinagoga, “byonka byo aubanga kimye kyonse pa juba ja Sabado.” (Luka 4:16) Kisemi kyasangalalanga bingi kimye kyonse kyo bayanga ku nzubo ya Yehoba mu Yelusalema.