Jesu anokurira ku Nazareta, cidhorobha cidoko cainga cicikasisiri. Cidhorobha ici cinowanika ku mukhwiriro ko Judheya, ku ndharaundha ino matundhu yo ku Garireya, ngo kumavirira ko gandhwa guru rinozivika inga Jombe ro Garireya.

Kangaije Jesu wainga ano makore 2 o kubahwa, Jasefa na Maria pavakamutora kubva Ejipita kwenda ku Nazareta, zve zvinoita inga kuti ivona vainga no mwana umwe basi. Asi ngo kufamba ko nguva, vakazobara vanukuna va Jesu vanozwi: Jakobo, Jasefa, Simoni na Judha. Jasefa na Maria vaingavo no vana vokaji, hambzaji ja Jesu. Zvinoreva kuti Jesu wainga no vanukuna varongomuna no hambzaji mbiri.

Tinozviziva kuti Jesu wainga no ukama umweni. Takajija ndi Erizabheti no mwana wake, Johani, vanogara ndhambo no Judheya ngo divi ro kanjikazi. Saromee, munukuna wa Maria, mamudoko wa Jesu, ngo vaigara phedo, ku Garireya. Mwamuna wa Saromee ndi Zebhedheu. Kangaije vana vavo vaviri, Jakobo na Johani, vainga vanukuna va Jesu vana va mamudoko wake. Atizvizivi kuti pauhwanaidoko hwake, Jesu waitambireyo maningi kharu. Asi nguva yakazotevera ivona vakazova shamwari cika ndi cikevo ja Jesu vecishanda inga vajiji vake.

Jasefa waidikana kushanda maningi kuti ahise mbhuri. Waro, iyena anoita basa ro kuveza. Jasefa worera Jesu inga mwana wake kamare, ngo zvinoitisa  kuti Jesu adaninjwe kuti “mwana wo muvezi.” (Mateu 13:55) Jasefa wakajijisavo Jesu basa ro kuveza, zve Jesu wakarijija ushoni. Ngo zvakaitisa kuti vandhu vanange kudari ngo pamusoro pa Jesu: ‘Uwu i muvezi.’—Marco 6:3.

Upenyu hwo mbhuri ya Jasefa hwaibatikana maningi ngo zvokunamata Jehovha. Vecizwira Mutemo ja Mwari, Jasefa na Maria vanopekeja vana vavo rovejo jo kumujimu ‘vakagara pamuzi, vecifamba mugwanja, vecivata pomwe no kumuka.’ (Deuteronòmio 6:6-9) Ku Nazareta kwainga no sinagoga, tingava no cokwadi kuti Jasefa waienda no mbhuri yake nguva jese kuti vaende konamata Jehovha musinagogemo. Ngo zvakaitisa kuti Bhaibheri rizonange kuti Jesu waienda mu sinagoga “kudari ngo cirovejeso cake.” (Luka 4:16) Kunja kwa izvi, mbhuri iyi inodakara maningi painoita hwendo kwenda ku thembheri ya Jehovha ku Jerusarema.