Si Jesus et binmaleg ed Nazaret, melag tan ordinaryon syudad. Wala iyad norte, diad kapukdolan a lugar a tatawagen ya Galilea, paonlad sagur na Dayat na Galilea.

Nen manga duay taon nen Jesus, sikatoy inawit diman nen Jose tan Maria manlapud Ehipto. Mapatnag ya si Jesus ni labat so anak dad saman. Balet agnambayag, wala la ray agagi tod ina​—si Santiago, Jose, Simon tan Judas. Wala met iray anak a bibii di Jose tan Maria. Kanian manga anemira so agagi nen Jesus.

Siempre wala met iray kakanayon nen Jesus. Amta ti la so nipaakar ed si Elizabet tan say anak ton si Juan. Sikaray manaayam pigaran kilometro ed abalaten, diad Judea. Asingger irad panaayaman nen Salome diad Galilea, a nayarin agi nen Maria tan panginaen nen Jesus. Say asawa nen Salome et si Zebedeo. Say duaran anak da, si Santiago tan Juan et nayarin kapinsan a peteg nen Jesus. Agtayo amta no akaiba nen Jesus irayan ugugaw diad ibabaleg da, balet sikaray nagmaliw ya maapit a kaulop to, tan nanlingkor ira bilang apostol to.

Kaukolan ya mantrabahon maong si Jose pian nalegpet toy pamilya to. Sikatoy karpentero. Pinabaleg nen Jose si Jesus a singa sarili ton anak, kanian atawag si Jesus ya “anak na karpentero.” (Mateo 13:55) Imbangat nen Jose si Jesus a mankarpentero,  tan akaaral a maong. Diad tua, oniay imbaga na totoo nipaakar ed si Jesus: “Saya imay karpentero.”​—Marcos 6:3.

Say bilay na pamilya nen Jose et akasentro ed panagdayew ed si Jehova. Pian naunor day Ganggan na Dios, ibabangat nen Jose tan Maria na espiritual iran instruksion iray ananak da ‘sano akayurong irad abung tan sano manaakar irad dalan tan sano akarukol ira tan sano ombangon ira.’ (Deuteronomio 6:6-9) Walay sinagoga ed Nazaret. Seguradon regular ya aawiten ditan nen Jose so pamilya to pian mandayew. Kanian nibaga ya “unong ed niyugali to lad agew na Sabaton,” si Jesus et oonlad sinagoga. (Lucas 4:16) Panliliketan met na pamilya ra so tinaon ya pambiabiahe paonlad templo nen Jehova diad Jerusalem.