Jesusqa Nazaret llaqtapin wiñaran. Chay llaqtaqa Galilea provinciapi orqo-orqo ladopi juch’uy llaqtallan karan, Galilea qochaq inti jaykuy ladonpin kasharanpas.

Jesustaqa iskay watanpi jina kashaqtinmi Josewan Mariawan Egipto llaqtamanta apamunkuman karan. Chay tiempopaqqa pay sapallanmi wawanku kanman karan. Chaymantañan nacenkuman karan wayqenkuna: Santiago, José, Simón, Judas ima. Kallarantaqmi panankunapas. Llapanpiqa Jesuspa wayqe-panankunaqa soqtan karan otaq maspas.

Jesuspaqa kallarantaqmi juj familiankunapas. Jujninmi karan Elisabet wawan Juanpiwan, Juanqa karupin tiyaran Judea ladopi. Jujnin familiantaq Galileapi tiyaran, paymi karan Salomé, payqa maman Mariaq ñañanmi kanman karan, chhaynaqa Jesuspa tiyanmi kanman karan. Salomeq qosanmi karan Zebedeo, wawankunataq karan Santiagowan Juanwan, paykunan Jesuspa ñaupaq primonkuna kanman karan. Manan yachakunchu Jesuswan kuskachus paykuna wiñaranku icha manachus chayta, tiempowanmi ichaqa iskayninku Jesuspa allin amigonkuna kapuranku, arí, apostolninkunan kapuranku.

Askhataq Jesuspa wayqe-panankuna karan chayqa, anchatachá Joseqa llank’anan karan. Joseqa carpinteron karan. Payqa wawanta jinapunin Jesustaqa uywaran, chaymi Jesustaqa “carpinteroq wawan” nispa niqku (Mateo  13:55). Joseqa allintachá payta yachachiran carpinteroq ruwananta, Jesuspas allintachá chay ruwaytaqa yacharan. Chaychá paytaqa “carpintero” nispa niranku (Marcos 6:3).

Joseqa allintan familianta yanaparan Diosta servinankupaq. Diospa kamachisqanman jinan Mariawan kuska wawankuta yachachiranku “wasipi kashaspa, purishaspapas, jinallataq puñuykushaspa, jatarishaspapas” (Deuteronomio 6:6-9). Chaymantapas Joseqa mana faltaytachá familianta apaq tiyasqanku llaqtapi Diosmanta yachachina sinagoga wasiman, chaypi Diosta adoranankupaq. Chaychá juj kuti Jesusmanta nikuran: ‘Imaynachus ruwallaqpuni jinatan sinagogaman jaykuran’, nispa (Lucas 4:16). Chaymantapas paykunaqa anchatachá kusikuqku Jerusalenpi temploman rispa.