MATAUPU 9
A o Tuputupu Aʻe Iesu i Nasareta
-
UA FAATOʻATELEINA LE AIGA O IOSEFA MA MARIA
-
UA AʻOAʻOINA E IESU SE GALUEGA
Ua ola aʻe nei Iesu i Nasareta, o se aai e laʻitiiti ma e lē taʻutaʻua. E tū lenei aai i le itu i mātū o Iutaia, i atumauga o Kalilaia, lea e i le itu i sisifo o le vaituloto telē ua taʻua o le sami o Kalilaia.
Pe tusa o le lua tausaga o Iesu, ae aumaia o ia i Nasareta e ona mātua mai i Aikupito. E foliga mai e na o ia le la tama i lea taimi. Mulimuli ane, ua fananau mai ona ʻafa uso o Iakopo, Iosefa, Simona ma Iuta, ma ua iai foʻi ona tuafāfine. O lona uiga, pe ā ma le toʻaono uso ma tuafāfine o Iesu.
E iai foʻi isi tauaiga o Iesu, e pei o Elisapeta ma lana tama o Ioane. E nonofo i laʻua i se vaipanoa mamao i le itu i saute i Iutaia. I Kalilaia, o loo nofo ai Salome, ma e foliga mai o ia o le uso o Maria le tinā o Iesu. O le tane a Salome o Sepetaio, ma o le la fanau tama o Iakopo ma Ioane, atonu o tauusoga na o Iesu. E tatou te lē iloa le tele o taimi na faaalu e Iesu ma ona tauusoga, ae na avea i laʻua ma uō vavalalata a Iesu, ma o ni ona aposetolo foʻi.
Ua tatau nei ona galue malosi Iosefa e tausia lona aiga ua faatoʻateleina. O ia o se kamuta, ma ua ia tausia aʻe Iesu e pei o sona lava atalii ma ua taʻua ai o ia o ʻle atalii o le kamuta.’ (Mataio 13:55) Ua aʻoaʻo e Iosefa Iesu e avea o se kamuta lelei, ma o le toʻatele o tagata ua faapea mai: ʻPe e lē o ia ea o le kamuta?’—Mareko 6:3.
E taulaʻi olaga o le aiga o Iosefa i le tapuaʻiga iā Ieova. E tusa ai ma le Tulafono a le Atua, ua avatu e Iosefa ma Maria faatonuga e aʻoaʻoina ai le la fanau i le itu faaleagaga, ʻpe a latou nonofo i le fale, pe a savavali i le ala, pe a taooto ma pe a tulaʻi foʻi.’ (Teuteronome 6:6-9) E iai le sunako i Nasareta, ma e masani ona ō i ai Iosefa ma lona aiga e tapuaʻi ai i inā. Ua faamatalaina i le Luka 4:16 ʻle masaniga a Iesu o le alu lea i le sunako i le aso sapati.’ O se taimi fiafia tele mo le aiga o Iosefa le malaga i tausaga taʻitasi i le malumalu o Ieova i Ierusalema.