Yesus e gro kon bigi na ini Nasaret, wan pikin foto di no prenspari so. A de na a noordsei fu Yudea, na ini a bergikontren fu Galilea di de na a west-sei fu wan bigi pisi watra di den a kari a Se fu Galilea.

A kan taki Yesus ben abi sowan tu yari na a pisi ten di Yosef nanga Maria drai kon baka fu Egepte. A sori leki na a ten dati Yesus ben de a wan-enkri pikin fu den. Ma bakaten den e kisi Yakobus, Yosef, Simon nanga Yudas. Disi na den afubrada fu Yesus. Yosef nanga Maria ben kisi umapikin tu. Sobun, Yesus ben abi afusisa tu. Soleki fa a sori, dan Yesus e kisi sowan siksi brada nanga sisa di yongu moro en.

A no de fu taki dati Yesus abi tra famiri tu. Wi ben leisi kaba fu Elisabet nanga en manpikin Yohanes. Den e tan furu kilometer moro fara na ini Yudea di de na zuidsei. Na ini Galilea, krosibei fu Yosef nanga en osofamiri, Salome e tan. Soleki fa a sori, dan disi na a sisa fu Maria, sobun a tante fu Yesus. A masra fu Salome nen Sebedeyus. Den tu manpikin fu den, Yakobus nanga Yohanes na neef fu Yesus. Wi no sabi efu Yesus ben de furu nanga den boi disi di den ben yongu, ma bakaten den tron bunbun mati fu Yesus. Den tron tu fu den twarfu apostel fu en.

Yosef musu wroko bun tranga fu sorgu en osofamiri di e kon moro bigi. A de wan temreman. Yosef e kweki Yesus leki en eigi pikin. Dati meki den  e kari Yesus „a manpikin fu a temreman” (Mateyus 13:55). Yosef e leri Yesus a temrewroko tu èn Yesus e leri fu du a wroko bun. Fu dati ede sma taki fu en bakaten: „En na a temreman.”​—Markus 6:3.

A moro prenspari sani na ini na osofamiri fu Yosef na a anbegi fu Yehovah. Soleki fa a Wet fu Gado e taki, dan Yosef nanga Maria e leri den pikin sani fu Gado ’te den e sidon na ini den oso, te den e waka na strati, te den e didon, èn te den opo’ (Deuteronomium 6:6-9). Wan snoga de na ini Nasaret. A no de fu taki dati ala ten Yosef e tyari en osofamiri fu anbegi Gado drape. Na ini Bijbel wi e leisi bakaten taki Yesus ben e go na a snoga ’soleki fa a ben gwenti du na Sabat-dei’ (Lukas 4:16). Ibri leisi te Yosef nanga en osofamiri ben e go na a tempel fu Yehovah na Yerusalem, den ben e prisiri.