Yesu wangukuliya ku Nazareti, yo yenga tawuni yimana ndipuso yambula kuziŵika ukongwa. Tawuni iyi yenga muchigaŵa cha mapiri ku Galileya, chakuzambwi kwa nyanja yikulu yo yidanika kuti Nyanja ya Galileya.

Yesu watenere kuti wenga ndi vyaka viŵi pa nyengu yo apapi ŵaki atuwanga nayu ku Ijipiti. Viwoneka kuti pa nyengu iyi, Yosefi ndi Mariya ŵenga ndi mwana yumoza pe. Kweni pati pajumpha nyengu, Yosefi ndi Mariya angubala ŵana anyaki. Ndipu mazina ngawu ŵenga Yakobe, Yosefi, Simoni ndi Yudasi. Yiwu angubala so ŵana anthukazi. Mwaviyo, Yesu wenga ndi avurwa ŵaki ndipuso azichi ŵaki akukwana 6.

Yesu wenga so ndi abali ŵaki anyaki, Elizabeti ndi mwana waki Yohane. Yiwu ajanga ku Yudeya, kumwera kwa Nazareti. Kweniso, Yesu wenga ndi anyina amana a Salomi. Yiwu ŵenga avurwa aku Mariya ndipu ajanga ku Galileya, kufupi ndi ko banja laku Yosefi lajanga. Mulumu waku Salomi wenga Zebediya. Yiwu ŵenga ndi ŵana ŵaŵi anthulumi, Yakobe ndi Yohane. Tiziŵa cha asani Yesu wachezanga ndi Yohane ndi Yakobe pa nyengu yo akuliyanga, kweni ŵati akuwa anguzija abwezi ŵaki apamtima chifukwa anguja mugulu la akusambira ŵaki.

Yosefi wakhumbikanga kugwira ntchitu mwaphamphu kuti waphwere banja laki. Iyu wenga kalipentala. Chifukwa chakuti Yosefi waleranga Yesu nge mwana waki chayiyu, Yesu waziŵikanga kuti “mwana waku kalipentala.” (Mateyu 13:55) Yosefi wangusambiza Yesu ntchitu ya ukalipentala. Ndipu chifukwa chakuti Yesu wayiziŵanga umampha ntchitu yeniyi, ŵanthu amukambanga kuti: “Uyu ndi kalipentala.”—Mariko 6:3.

 Banja laku Yosefi layanjanga kusopa Yehova. Yosefi ndi Mariya asambizanga ŵana ŵawu vinthu vauzimu. Yiwu achitanga viyo chifukwa alondonga Dangu laku Chiuta lakuti asambizengi ŵana ŵawu ‘asani aja pasi munyumba zawu, pakwenda pamsewu, pakugona ndipuso asani ayuka.’ (Marangu 6:6-9) Ku Nazareti kwenga so sinagogi. Mwaviyo, Yosefi watenere kuti walutanga ndi banja laki losi kuti akasopi. Ndipu Yesu wangulutirizga kuluta ku sinagogi mpaka po wangukuliya chifukwa malemba ngakamba kuti ndimu “wachitiyanga nyengu zosi pa zuŵa la Sabata.” (Luka 4:16) Banja ili lakondwanga so ukongwa ndi maulendu ngakuluta kunyumba yakusopiyamu yaku Yehova ku Yerusalemu.