Ne tupu aka a Iesu i Nasaleta, se tamā fa‵kai telā e se nā lō ko tāua. Ne tu te fa‵kai tenā i te feitu ki matū, i te koga maugā ko Kalilaia, i te feitu ki togala o te vaitafe lasi lauiloa ko te Tai o Kalilaia.

I te taimi kāti ko lua fua ei ana tausaga, ne aumai ei a Iesu ki konei ne Iosefa mo Malia mai Aikupito. E foliga mai me ko ia fua ko te lā tama i te taimi tenā. Fakamuli ifo ne fa‵nau mai ana āfa taina—Iakopo, Iosefa, Simeona, mo Iuta. Ne isi foki ne tamaliki fā‵fine a Iosefa mo Malia, ko āfa tuagane o Iesu. Ao, kāti e toko ono a taina mo tuagane fo‵liki o Iesu.

E tonu, e isi aka foki ne kāiga o Iesu. Ko oti ne iloa ne tatou a Elisapeta mo tena tama, ko Ioane. Ne ‵nofo i te fia o maila te ‵mao ki te feitu ki saute, i Iuta. Ne nofo pili atu i Kalilaia ko Salome, telā kāti ko te taina o Malia, kae ko te fakamātua o Iesu. A te avaga a Salome ko Sepetaio. A lā tama‵liki tāgata e tokolua, ko Iakopo mo Ioane, e foliga mai me ko fakataina tua tasi o Iesu. E se iloa ne tatou me ne masani malosi a Iesu mo tamaliki tāgata konā a koi ‵tupu aka latou, kae fakamuli ifo ne fai latou mo fai ana taugasoa ‵pili, kolā ne tavini atu e pelā me ne apositolo e tokolua a Iesu.

Ne ‵tau o galue malosi a Iosefa ke fesoasoani atu ki tena kāiga telā ne gasolo o tokouke. A ia se kamuta. E tausi ne Iosefa a Iesu e pelā me ko tena tama tonu, telā ne taku ei a Iesu ko te “tama a te kamuta.” (Mataio 13:55) Ne fakaakoako ne Iosefa a Iesu ke fai mo fai se kamuta, kae ne tauloto faka‵lei a ia ki ei. A te ‵tonuga loa, ne fai fakamuli atu penei  a tino e uiga ki a Iesu: “Tenei te kamuta.”—Maleko 6:3.

Ne fakavae te olaga o te kāiga o Iosefa ki te tapuakiga ki a Ieova. I te tausiga o te Tulafono a te Atua, ne akoako ne Iosefa mo Malia lā tama‵liki ki mea faka-te-agaga ‘i te taimi ne ‵nofo ei latou i te lotou fale mo taimi ne sa‵sale atu latou i te auala mo taimi ne ta‵kato fakatasi latou, kae ‵tu atu foki latou ki luga.’ (Teutelonome 6:6-9) Ne isi se sunako i Nasaleta. E mafai eiloa o tali‵tonu tatou me ne ave sāle ne Iosefa tena kāiga ke tapuaki atu i konā. Ne fai fakamuli mai me “e ‵tusa mo tena masani,” ne fanatu a Iesu ki te sunako. (Luka 4:16) Ne fia‵fia malosi a te kāiga i olotou malaga kolā ne fai sāle ki te faletapu o Ieova i Ielusalema.