Ua paari mai Iesu i Nazareta, te hoê oire iti. Tei te pae apatoerau taua oire ra, i te hoê tuhaa fenua mouˈa parauhia Galilea, i te pae tooa o te râ o te roto rahi parauhia miti o Galilea.

E piti paha matahiti to Iesu i to ˈna afairaahia e Iosepha raua Maria i reira mai Aiphiti mai. E au ra e i taua taime ra, o ˈna anaˈe ta raua tamarii. I muri aˈe râ, fanauhia maira to Iesu mau taeae ra o Iakobo, Iosepha, Simona e Iuda. E tamahine atoa ta Iosepha raua Maria, te mau tuahine ïa o Iesu. E ono aˈe ïa taeae e tuahine to Iesu no muri mai ia ˈna, hoê â metua vahine to ratou.

Parau mau, e fetii ê atu to Iesu. Ua matau ê na tatou ia Elisabeta e ta ˈna tamaiti o Ioane. I te pae apatoa roa i Iudea raua e faaea ˈi. I pihai iho mai i Galilea, te vai ra o Salome, o Zebedaio ta ˈna tane faaipoipo. E au ra e e tuahine o ˈna no Maria te metua vahine o Iesu. Mai te peu tera iho â, e taeae fetii ïa no Iesu ta raua na tamaiti o Iakobo raua Ioane. Aita tatou i ite e hoê â anei to ratou paariraa mai. I muri aˈe râ, e hoa piri roa ratou e e aposetolo raua na Iesu.

Ua rohi Iosepha no te faatamaa i to ˈna utuafare e rahi mai ra. E tamuta oia. Ua faaamu Iosepha ia Iesu mai ta ˈna iho tamaiti. No reira Iesu i piihia ˈi “te tamaiti a te tamuta.” (Mataio 13:55) Ua haapii Iosepha ia Iesu i te toroa tamuta atoa, e ua ite roa Iesu i te rave i taua ohipa ra. Inaha,  ua faahiti te taata ia Iesu i muri aˈe mai “te tamuta.”—Mareko 6:3.

I roto i te oraraa o Iosepha e to ˈna utuafare, o te haamoriraa ia Iehova te mea faufaa roa ˈˈe. Ua pee maite raua Maria i te ture a te Atua ia Mose, ma te haapii i ta raua mau tamarii i te mau ohipa pae varua ia parahi ratou i roto i te fare, ia haere na te eˈa, ia taoto e ia tia mai. (Deuteronomi 6:6-9) E sunago tei Nazareta. Papu roa e ua afai tamau Iosepha i to ˈna utuafare i reira no te haamoriraa. I muri aˈe, i haere na Iesu i te sunago “mai ta ˈna i matau i te mahana Sabati.” (Luka 4:16) I oaoa roa atoa na te utuafare i to ratou mau tere tamau i te hiero o Iehova i Ierusalema.