Yesu o kulila vo Nasara olupale lumue lutito, haluo ka lua kemãlele. Olupale luaco, lu kasi konano yo Yudea kimbo liolomunda ko Galilea, kutakelo wociva cimue cinene ca kũlĩhĩwa okuti, Okalunga ko Galilea.

Citava okuti, Yesu wa kuata anyamo avali eci Yosefe la Maria vo nena vo Nasara oku tunda Kegito. Kotembo yaco citava okuti, va kuatele lika omõla umosi okuti, Yesu. Vokuenda kuotembo kua citiwa vamanjaye okuti: Tiago, Yosefe, Simono, kuenda Yuda. Yosefe la Maria va kuatavo omãla vakãi. Omo liaco, Yesu wa kuata vamanjaye epandu okuti, alume lakãi.

Ocili okuti, Yesu o kuete vangandiaye vakuavo. Tua konomuisa ale eci catiamẽla ku Elisavete kuenda komõlaye Yoano. Ovo va kasi ocipãla lo kombuelo yo Yudea. Pole, ocipepi lo Galilea, ku sangiwa Salome. Citava okuti, eye wa kala manji a Maria, kuenda pahãyi ya Yesu. Ulume wa Salome, Sebedeo. Omãla vavo vavali valume, Tiago la Yoano citava okuti, va kala apalume va Yesu. Ka tua kũlĩhĩle nda vutila Yesu wa kala lavo otembo yalua. Pole, noke veya oku kala akamba vawa va Yesu kuenda va pangele onepa kovapostolo vaye.

Yosefe o sukila oku talavaya calua oco a tekule epata liaye. Eye okalupindelu. Yosefe o tekula Yesu ndomõlaye muẽle. Eli olio esunga lieci a tukuiwila hati, “omõla a kalupindelu.” (Mateo 13:55) Yosefe o longisa Yesu oco a kale kalupindelu  kuenje eye o lilongisa ciwa umesele waco. Omo liaco, noke omanu veya oku popia catiamẽla ku Yesu hati: “U siti kalupindelu.”—Marko 6:3.

Yosefe kumue lepata liaye va pitisile kovaso efendelo lia Yehova. Omo lioku pokola Kocihandeleko ca Suku, Yosefe la Maria va longisa omãla vavo ‘poku tumãla vonjo yavo, leci va enda vonjila, poku pekela, kuenda poku pasuka.’ (Esinumuĩlo 6:6-9) Ko Nasara kuli osunangonga yimue. Omo liaco, tu pondola oku popia okuti, Yosefe wa enda oku ambata epata liaye vosunangonga yaco, oco va ka fendele Yehova. Eli olio esunga lieci Embimbiliya li popela okuti, noke Yesu wa iñila vosunangonga “ndeci ca kala ocituwa caye keteke Liesambata.” (Luka 4:16) Handi vali, epata li kuete esanju lialua, omo lioku linga ungende woku enda olonjanja viosi vonembele ya Yehova ko Yerusalãi.