Yesu annunwe oNazarethi, epooma yaamukhaani yeeyo yahooneliwa vatthu. Epooma ele yaari mpantta onikela epheyo wa oYudeya, omyaakoni wa oGalileya, mpantta onikela nsuwa wa Ephareya ya oGalileya.

Waaniheryasa, Yesu aahikhuma wEjiitu ni anamuyari awe orina ene iyaakha piili. Woonasa wene, okathi ole yaarina mwaana mmosa. Muhoolo mwaya, Yosefe ni Maria yaahaayara anamwane akina, eyo piiyo, Yakobo, Yosefe, Simoni ni Yuda. Nave, Yosefe ni Maria yaahaayara anamwane aaxithiyana. Nto eyo enooniherya wira Yesu aahikhalana axirokorawe ni axihima awe 6.

Mwekeekhai, Yesu aahikhalana amusi akina. Hiyo nihiixutta sa Elizabeti ni mwanawe iihaniwa Yohani. Awo yaakhala ikiloomo sinceene mpantta wa okuusini wa oYudeya. Salome aakhala waattamela oGalileya, nto owo aari muhima awe Maria, niire so, naakhe awe Yesu. Salome aatheliwe ni Zebedeyo. Nave yaahikhalana anamwane anli, Yakobo ni Yohani. Hiyo khaninsuwela akhala wira ori ene mmiravo, Yesu aahiviriha okathi munceene ni Yakobo ni Yohani. Masi ninnisuwela wira muhoolo mwaya, awo yaahikhala apatthani ni arummwa awe.

Yosefe aari kalapintero. Nto owo aaniimananiha vanceene wira olyihe emusi awe. Yosefe aahimuhuwa Yesu ntoko mwanawe, maana Yesu iihaniwa, “mwana a kalapintero”. (Matheyo 13:55) Yosefe aahimwiixuttiha Yesu okalapintero,  nto Yesu aahiixutta saana. Amuhimyaka Yesu, atthu yaanikoha wira: “Ola khahiyó kalapintero?”​—Marko 6:3.

Yosefe ni emusi awe yaaniluttuweliwa omukokhorela Yehova. Ottharaka Nlamulo na Muluku, Yosefe ni Maria yaanaalakiherya anaaya momunepani ‘akilathiki owannyeya walá yettaka mukwaha, yimmathiki walá avenyaka’. (Otumererya 6:6-9) Muttetthe wa oNazarethi yaahikhala eSinagoga. Ninnikupali wira moohicompela, Yosefe aanirowa ni emusi awe eSinagoga ele. Muhoolo mwaya, Yesu aahivikaniha orowa opuro ole, maana Biibiliya onihimya so: “Nihiku na Sábadu, ahikela mpani mothukumana, yaihaniwa sinagoga, ntoko salimalenlyawe”. (Luka 4:16) Nave emusi yotheene yaanihakalala vanceene, vaavo moohicompela yaarowaka otemplo oYerusalemu.