Jesuseʼ tiʼ nojochchaj tu chan kaajil Nazareteʼ. Junpʼéel chan kaaj yaan tu witsiloʼob Galilea, tu xaaman Judea yéetel ku pʼáatal tu chiikʼin u kʼáaʼnáabil Galilea.

Maʼ xaaneʼ Jesuseʼ yaan kaʼapʼéel jaʼab tiʼ ka lukʼ José yéetel María tu luʼumil Egipto. Teʼ kʼiinoʼob jeʼeloʼ Jesuseʼ minaʼan u yíitsʼinoʼob. Baʼaleʼ ka máan kʼiineʼ yanchaj u yíitsʼinoʼob, u kʼaabaʼobeʼ Santiago, José, Judas yéetel Simón. José yéetel María xaneʼ anchaj u x-chʼupul paalaloʼob. Jeʼex k-ilkoʼ Jesuseʼ anchaj kex seis u yíitsʼinoʼob, xiiboʼob yéetel koʼoleloʼob.

Baʼaleʼ Jesuseʼ yaan kaʼach u maasil u láakʼtsiloʼob. Kʼaʼajaktecheʼ tsʼoʼok k-yáax tʼaan tiʼ Elisabet yéetel Juan, u hijo. Letiʼobeʼ náach kajaʼanoʼob, tu noojol Judea. Le máax maas naatsʼ kajaʼan tiʼoboʼ Salomé, maʼ xaaneʼ u kiik María, bey túunoʼ u tía Jesús. U yíicham Salomeeʼ Zebedeo. Letiʼobeʼ yaan kaʼatúul u paalaloʼob, Santiago yéetel Juan, u primoʼob Jesús. Maʼ k-ojel wa tu máansaj yaʼab tiempo Jesús tu yéeteloʼob tu paaliloʼobiʼ, baʼaleʼ ka nuukchajoʼobeʼ jach tu bisubaʼob, kʼuch tak u beetubaʼob u apostoloʼob.

Joseeʼ yaʼab meyaj ku beetik kaʼach utiaʼal u tsʼáaik baʼax kʼaʼabéet ichil u yotoch. Letiʼeʼ carpintero. Joseeʼ tu líiʼsaj Jesús bey u hijoeʼ, le oʼolal ku yaʼalaʼaltiʼ «u paal le carpinterooʼ» (Mateo 13:55). Joseeʼ tu kaʼansaj Jesús u beet xan u  carpinteroil, letiʼeʼ jach tu kanaj tubeel. Le oʼolal le máakoʼoboʼ tu yaʼaloʼobeʼ Jesuseʼ «letiʼe carpintero[oʼ]» (Marcos 6:3).

U familia Joseeʼ tu tsʼáajoʼob táanil u adorartikoʼob Jéeoba. Jeʼex u yaʼalik le Leyoʼ, José yéetel Maríaeʼ tu kaʼansoʼob tiʼ u paalaloʼob u meyajtoʼob Dios ken kulakoʼob ichil u yotochoʼob, ken xiʼikoʼob teʼ bejoʼoboʼ, ken chilakoʼob yéetel ken líikʼkoʼob (Deuteronomio 6:6-9). Tu kaajil Nazareteʼ yaan kaʼach junpʼéel Sinagogaiʼ. Le oʼolal jeʼel u páajtal k-tuklikeʼ Joseeʼ ku bin yéetel u familia mantatsʼ u adorartoʼob Jéeobaiʼ. Le oʼolal ka máan kʼiineʼ aʼalaʼabeʼ «jeʼex suukil u beetik tu kʼiinil Sabadoeʼ» Jesuseʼ bin teʼ sinagogaoʼ (Lucas 4:16). Tsʼoʼoleʼ suukaʼan kaʼach u binoʼob tu kaajil Jerusalén u adorartoʼob Jéeoba teʼ templooʼ, lelaʼ ku beetkoʼob yéetel kiʼimak óolal.