Gbiɛ be su. Lɔ ɔ he ɔ, be su nɛ Yosef weku ɔ kɛ a weku li kpahi, kɛ a huɛmɛ maa hia blɔ kɛ ya Yerusalem kaa bɔ nɛ a peeɔ daa jeha a. A ya yeɔ Hetsɔmi ɔ ngɛ lejɛ ɔ kaa bɔ nɛ Mose Mlaa a tsɔɔ ɔ. (5 Mose 16:16) Kɛ je Nazaret kɛ yaa Yerusalem ɔ kɛmi maa pee kaa si tomi 75. Ke e su jamɛ a be ɔ, deka be nihi a he kulaa, nɛ nɔ tsuaa nɔ bua jɔɔ. Amlɔ nɛ ɔ nɛ Yesu ye jeha 12 ɔ, e kɛ bua jɔmi ngɛ blɔ hyɛe kaa nyami be ɔ maa su konɛ e kpale ná he blɔ kɛ ya sɔlemi we ɔ.

Pi Hetsɔmi gbijlɔ ɔ yemi he pɛ nɛ Yosef kɛ e weku ɔ a yaa Yerusalem ngɛ. Ke a ye Hetsɔmi gbijlɔ ɔ ta a, e nɔ jena a, a jeɔ Abolokplolo Nyami Be ɔ nɛ a kɛ ligbi kpaago yeɔ ɔ sisi. (Marko 14:1) A buu nyami be ɔ kaa e piɛɛ Hetsɔmi gbijlɔ ɔ he. Blɔ nɛ a hiaa kɛ jeɔ Nazaret kɛ yaa Yerusalem, kɛ lejɛ ɔ nɛ a hiɔ, kɛ a se nɛ a kpaleɔ ɔ tsuo ngɔɔ mɛ maa pee kaa otsi enyɔ. Se jeha nɛ ɔ, nɔ́ ko nɛ ba ngɛ Yesu blɔ fa mi ɔ ha nɛ a se kɛ pe jã. Benɛ a kpale a se kɛ yaa Nazaret ɔ, nyagba ko ba.

Benɛ a ngɛ blɔ nɔ kɛ yaa a, Yosef kɛ Maria susu kaa Yesu piɛɛ a weku li kɛ a huɛmɛ nɛ a kɛ mɛ ngɛ blɔ ɔ hiae ɔ a he. Se benɛ du ngɛ bue nɛ a ya su he ko nɛ a maa to ɔ, a nɛ́ lɛ. Enɛ ɔ he ɔ, a hla lɛ hluu ngɛ a nyɛmimɛ ɔmɛ a kpɛti, se loloolo ɔ, a nɛ́ lɛ. A bi ɔ laa! Yosef kɛ Maria kpale kɛ ho Yerusalem ya konɛ a ya hla lɛ ngɛ lejɛ ɔ.

A hla lɛ kɛ je mɔtu hluu kɛ ya si gbɔkuɛ, se a nɛ́ lɛ. E nɔ jena a hu a nɛ́ lɛ. Ligbi etɛne ɔ, a ya sɔlemi we ɔ. A ya na Yesu nɛ e hii si ngɛ Yuda mlaa tsɔɔli ɔmɛ a kpɛti. E ngɛ mɛ tue bue nɛ e ngɛ mɛ sanehi bie, nɛ a nya kpɛ a he ejakaa a na kaa e juɛmi mi kuɔ.

Maria bi lɛ ke, ‘Ye bi, mɛni he je nɛ o pee wɔ kikɛ nɛ ɔ? I kɛ o tsɛ wa kpa si hla mo kɛ hɛdɔ.’​​—Luka 2:48.

E pee Yesu nyakpɛ kaa a li kaa e maa hi sɔlemi we ɔ. E bi mɛ ke: “Mɛni he je nyɛ ngɛ mi hlae? Anɛ nyɛ li kaa e sa kaa ma hi Tsaatsɛ we ɔ lo?”​​—Luka 2:49.

Benɛ a na Yesu ɔ, a kɛ lɛ kpale a se kɛ ho Nazaret ya, nɛ e ya nɔ nɛ e ba e he si ha mɛ. Yesu ya nɔ nɛ e wa ngɛ nɔmlɔ tso mi, nɛ e le ní. E ngɛ mi kaa jamɛ a be ɔ mi ɔ, e wɛ mohu lɛɛ, se Mawu kɛ nimli adesahi tsuo ná e he bua jɔmi. Ngɛ anɔkuale mi ɔ, benɛ Yesu ngɛ wae ɔ, e pee nɔ hyɛmi nɔ́ kpakpa ngɛ Mawu jami mi, nɛ e bu e fɔli ɔmɛ hulɔ.