Ngoi alingbi fadeso awe ti tene Joseph na sewa ti lo asara voyage ti ala so ala yeke sara ka ni na popo ti nze ti mars na avril, ngu oko oko, ti gue na Jérusalem. Ala yeke sara voyage ni so legeoko na akamarade nga na ambeni fami ti ala. Ala kue ayeke gue kâ ti sara matanga ti Pâque, tongana ti so Ndia ahunda lani (Deutéronome 16:16). Nazareth na Jérusalem ayo na mba akilomètre 120 tongaso. Ngoi ni so lani ayeke mbeni ngoi ti ngia mingi, me kua ayeke nga dä mingi. Na ngoi ni so, Jésus ayeke lani gi na ngu 12 na lo yeke ku lani matanga ni so ti wara lege ti gue encore na temple.

Ti Jésus na azo ti sewa ti lo, Pâque ayeke ninga gi lango oko ape. Lango so aga na peko ti Pâque ayeke tongo nda ti lango mbasambala ti Matanga ti mapa so a zia levure dä ape (Marc 14:1). A yeke bâ matanga so tongana mbeni mbage ti ngoi ti matanga ti Pâque. Ni la, tongana a mû ngoi so ala yeke sara na lege na guengo ni na Jérusalem nga na kiringo ni, na a bungbi na ati so ala yeke sara kâ na Jérusalem ni, e peut ti tene so a yeke sara ayenga use tongaso. Me ti ngu ni so, ala ninga ahon so, ndali ti so mbeni ye apassé. Mbeni kpale so Joseph na Marie ahinga ni gi na ngoi so ala yeke londo na Jérusalem ti kiri na ndo ti ala.

Na kiringo ni, Joseph na Marie abâ ti ala atene Jésus ayeke na milieu ti ambeni fami na akamarade ti ala so ala na ala ayeke sara voyage legeoko ti kiri. Ye oko, tongana ala luti ti lango na lege na bï, ala bâ Jésus ape. Tongaso, ala tara ti gi lo na popo ti akamarade ti ala ni, me kue gbä ala wara lo ape. Molenge ti ala ayeke dä ape! Tongaso, Joseph na Marie akiri na Jérusalem, ti gue ti gi Jésus kâ.

Na ndapre juska na lakui, ala gi lo ala wara lo ape. Na lango use ni kue ala wara lo ape. Na lango ota ni fadeso awe la si ala wara lo, na yâ ti temple. Ala wara lo na yâ ti mbeni oko ti ada so ayeke na yâ ti temple, na milieu ti awafango ye ti aJuif. Lo yeke mä ala nga lo yeke hunda tënë na ala. Bê ti awafango ye ni apika mingi ndali ti aye so lo hinga.

Marie angbâ atene na lo: “Aï, molenge ti mbi, mo sara na e tongaso ngbanga ti nyen? Mbi na babâ ti mo, e gi mo na ndo kue e wara mo ape.”—Luc 2:48.

Li ti Jésus akpe kue ti bâ so ala hinga pëpe ndo so ala peut fade ti wara lo dä. Ni la, lo tene na ala: “Ala yeke gi mbi ngbanga ti nyen? Ala hinga ape so mbi doit ti duti na yâ ti da ti Babâ ti mbi?”—Luc 2:49.

So ala kue akiri awara tere awe so, Jésus akiri na Nazareth legeoko na Joseph na Marie, na lo ngbâ lakue ti woko tere na gbe ti ala. Na ndara ti Jésus angbâ lani ti maï nga lo yeke kono ti ga koli. Même so lo de lani maseka, lo yeke nzoni na lê ti Nzapa nga na lê ti azo. Ni la, depuis kete ti lo, Jésus ayeke gi pëpe tapande ti zo so azia aye ti yingo na kozo ndo, me lo yeke nga mbeni molenge so ayeke ne babâ na mama ti lo.