Dwi abusiel ukadhu, niai ma Yohana ucaku niyero lembanyong’a, e Yesu de ma dong’ oro pare tundo kum 30, ubino ibang’e i kulo Yordan. Ebino nitimo ang’o? Ebino ngo niliewo Yohana aliewa, kunoke nineno kende kende kite m’ebemedere ko ku tic. Ento ebino nikwayu Yohana umii ire batizo.

Etie lembe mi zungo ngo ka Yohana uyero ire kumae: “An e ma can [batizo] m’amak i beng’i nega, e idong’ ibino i bang’a?” (Matayo 3:14) Yohana ung’eyo nia Yesu utie Wod Mungu masegi. Poi nia kinde ma fodi Yohana ubino i ic, epor malu ku mutoro kinde ma Maria ma tie ku ic pa Yesu, ubino niliewo min ma Elisabeti. M’umbe jiji, Elisabeti ukoro ire lembe maeno. Man ecicopere nia jukoro ire pi lemkwenda ma malaika ukelo nia jubinyolo Yesu, man pi jumalaika m’uwok ni jukwac uthieno, kinde ma junyolo Yesu.

Yohana ung’eyo nia batizo m’ebemio, utie pi dhanu ma gibeyewo dubo migi. Yesu ke ubino ng’atu m’umbe ku dubo. Kadok Yohana ukwero nimio ire batizo de, re Yesu ukwaye asu kumae: “Yi maeni kawono: kum emaku piny iwa kumeno ya waketh bedopwe ceke timbre kakare.”​—Matayo 3:15.

Pirang’o pire bino tek nia Yesu umak batizo? Batizo ma Yesu umaku ubino ngo lanyuth mi yewo dubo. Batizo m’emaku ubino ninyutho nia ewodhere en gire nitimo yeny pa Won. (Juebrania 10:5-7) Yesu ubino jabodho mi bau, re kawoni saa uromo ire m’ecak ko tic ma Won mi polo uore pire. Nyo iparu nia Yohana ung’eyo nia udu moko bitimere kinde m’ebimio batizo ni Yesu?

Yohana uyero kumae: “Ng’atu m’uora nimio [batizo] i pi, ewacu ira kumae, Ng’atu ma tek ibineno Tipo beloro i wie man ebedo i wie, en e ng’atu m’umio [batizo] i Tipo maleng’.” (Yohana 1:33) Pieno Yohana ubino nikuro nia Tipo pa Mungu biloro iwi ng’atu moko kinde m’ebimio ire batizo. Nimakere ku lembe maeno, kinde ma Yesu uai malu tho kud i pii, ebino ngo ni lembe mi zungo ni Yohana nineno nia ‘Tipo pa Mungu uloro iwi Yesu calu akuru.’​—Matayo 3:16.

Ento nisagu maeno, saa ma Yesu maku ie batizo, “polo yabre ire.” Eno tie ku thelemb’ang’o? Ecicopere nia tap saa maeno ma Yesu maku ie  batizo, Yesu upoi iwi kit kwo pare m’ebino ko i polo i wang’ nibino iwi ng’om. Pieno Yesu upoi iwi kwo pare m’ebedo ko karacelo ku Yehova ma Won i saa m’ebino i ie ku kum mi tipo, uketho i ie bende lemandha ma Yehova uponje ko iwang’ nibino iwi ng’om.

M’umedo maeno, i saa mi batizo pare, dwal uai i polo m’uyero kumae: ‘Maeni tie Woda, ma jamerna, ma mutoro nega ikume.’ (Matayo 3:17) Eno ubino dwand ng’a? Ecopere ngo nia eno ubed dwand Yesu en gire, pilembe etie karacelo ku Yohana. Eno ubino dwand Mungu. Ubenen kamaleng’ nia Yesu utie Wod Mungu, ento etie Mungu ngo.

Etie lemandha nia Yesu utie Wod Mungu, calu ma Adamu ng’atu ma kwong’a de ubino wod Mungu. Jalub ma nyinge Luka udok ukiewo lembe mae, ing’ei weco pi batizo pa Yesu: ‘Yesune, kan emaku ponjo, nwang’u rundi pare yenyo romo pier adek, ma juwacu nyo en e wod Yosefu, wod Eli, . . . wod Daudi, . . . wod Abraham, . . . wod Noa, . . . wod Adamu, wod Mungu.’​—Luka 3:23-38.

Tap calu Adamu ubino “wod Mungu,” Yesu de kumeno. Yesu umondo i winjiri ma nyen ku Mungu niai m’emaku ie batizo, man edoko ni wode mi tipo. Eno uketho Yesu utie ku copo mi ponjo dhanu ku lemandha mi polo, man ninyutho igi yo mi kwo. Yesu ucaku kit kwo ma bitere cil nithiero kwo pare ni lam pi judubo.