Bautisir Juanajj sojjta phajjsinakaw Diosan arunakap yatiyjjäna. Ukhaw Jesusajj Jordán Jawirar saräna. Ukapachajj Jesusajj niya 30 maranëjjänwa. ¿Kunarus Jesusajj ukar sarpachäna? Janiw aleq visitirikejj sarkänti, ni kunjamsa Juanajj yatiyaskäna uk uñjirikis sarkänti, jan ukasti bautisayasiñatakiw saräna.

Ukampis Juanajj Jesusar akham sänwa: “Antisas nayaw jumampi bautisayasiñajajja, ¿kamisarak nayampi bautisayasir jutätasti?” sasa (Mateo 3:14). Juanajja, Jesusajj Diosan Yoqapätap yatïnwa. Amtañäni, Mariajj usurïkasin Elisabetar visittʼir saräna ukhajja, Juanajj taykapan purakapankkäna ukhajj kusisiñat onjjtänwa. Ukjja Elisabetajj Juanar yatiypachänwa. Ukatjja Juanajj kunjamsa angelajj Mariar wawanïyätaw sasin yatiyäna, kunjamsa Jesusajj naskäna uka arumajj awatirinakar walja angelanakajj uñstkäna uksa yatpachänwa.

Juanajj juchanakapat arrepentisirinakarukiw bautisäna. Jesusajj janiw juchanïkänti, ukatwa Juanajj Jesusar jan bautisañ munkänti. Ukhamäkchïnsa Jesusajj Juanar sänwa: “Jichhajj iyawsakim, ukhamatwa kuntï Diosajj munki ukanak phoqañäni” sasa (Mateo 3:15).

¿Kunatsa Jesusan bautisasiñapajj wakisïna? Jesusajj janiw juchanakat arrepentisitapat bautisaskänti, jan ukasti Awkipan munañap lurañatakiw bautisasïna (Hebreos 10:5-7). Jesusajj carpinterönwa, jichhajj kunanak lurañapatakisa alajjpachankir Awkipajj khitanïna uk phoqañwa qalltañapäna. ¿Jesusajj bautisasiñapäkäna ukhajj kunas pasañapäna uk Juanajj yatpachänti?

Qhepatjja Juanajj akham sänwa: “Umamp bautisir khitankitu ukajj akham sasaw nayar situ: ‘Espíritu santo saraqanir uñjäta, mayni patjjankatap uñjarakïta ukhajja, ak yatiñamawa, jupaw espíritu santompi bautisirejja’” sasa (Juan 1:33). Juanajj maynir bautiskasina espíritu santo saraqanir uñjañwa suyaskäna. Jesusajj bautisasisin umat mistüna ukhajja, palomar uñtataw Diosan espiritupajj saraqanïna.  Ukajj Juanajj suykäna ukarjamapuniw pasäna (Mateo 3:16).

Jesusajj bautisaskäna ukhajja “alajjpachaw jistʼartäna”. ¿Kun sañsa ukajj muni? Bautisasisinjja, kunanaktï janïr aka oraqer jutkasajj alajjpachan lurkäna taqe ukanakwa Jesusajj amtpachäna. Ukatsti, Jehová Diosan Yoqapjamajj kunjamsa espíritu cuerponi alajjpachan jakasïna, kuna cheqa yatichäwinaksa Diosat yateqäna, taqe ukanakwa amtpachäna.

Ukatsti mä aruw alajjpachat istʼasirakïna, akham siri: “Jupajj Wawajawa, wali munatawa, nayajj wal jupat kusista” sasa (Mateo 3:17). ¿Uka arojj khitin arupäpachänsa? Janiw Jesusan arupäkänti, jupajj Juanampïskänwa. Uka arojj Jehová Diosan arupänwa. Ukhamajj Jesusajj janiw Diosäkiti, jan ukasti Diosan Yoqapawa.

Jesusajj nayrïr Adán chachjam Jehová Diosan wawapänwa. Jesusan bautisasitapat qellqañ tukuyasajj Lucas discipulojj sänwa: “Jesusajj Diosan arunakap yatiyañ qalltäna ukhajja, niya kimsa tunka maranïnwa. Kunjamtï jaqenakajj sapkänjja, jupajj Josean yoqapänwa, [...] Helí chachan yoqapänwa, [...] Davidan yoqapänwa, [...] Abrahanan yoqapänwa, [...] Noé chachan yoqapänwa, [...] Adanan yoqapänwa, Adanajj Diosan wawapänwa” sasa (Lucas 3:23-38).

Jesusajj Adanjam jaqënwa, jupjam Diosan wawaparakïnwa. Ukampis bautisasïna ukhajja, Jesusajj Diosan Wawapjam alajjpachar sarasaw jutïrin mä espiritur tukuñapäna, ukwa amuyjjäna. Ukhamatwa Jesusajj Diosan cheqa yatichäwinakap yatichañatakisa jakañar apir thaki uñachtʼayañatakis wakichtʼatäjjäna. Jucharar jaqenak layku jakañap aptʼasiñatakejj kunanakas wakisïna uk lurañwa qalltarakïna.