Bebee le sôñ isamaI i mbus le Yôhanes Nsôble a mbôdôl téé likalô, Yésu nu a gwé bebee le 30 ma nwii, a nlo nyeni i Lom Yordan. Inyuki? I ta ndik bé inyu yuuga liwanda jé, to inyu yi lelaa bôlô yé i nke. To, Yésu a nlo i bat Yôhanes le a sôble nye.

Yôhanes a neebe bé, a nkal le: “Wen u kôli sôble me, ndi wen u nlo i meeni?” (Matéô 3:14) Yôhanes a nyi le Yésu a yé Man Djob. Bigda le ngéda a bé libum li nyañ, Yôhanes a bi nyiñgha ni maséé ngéda Maria nu a bé jém li Yésu, a bi lo yuuga nyañ Yôhanes le Élisabet. Ibabé pééna, nyañ Yôhanes a bi sôk a kal nye jam li. Bebek a bi nigil ki le biañgel bi bi legel ligwéé li Yésu ni le bi bi pémél batééda mintômba i u Yésu a bi gwéé.

Yôhanes a nyi le sôble yé i yé inyu bet ba ntam bibéba gwap. Ndi Yésu a gwé bé béba. To hala kiki Yôhanes a ntjél, Yésu a nkal nye le: “Neebe hala inyu lini lisañ, inyule hala nyen i yé loñge inyu yés le di yônôs mam momasôna ma téé sép.”​—Matéô 3:15.

Inyuki i yé loñge le Yésu a kôs sôble? Yésu a bi sôblana bé inyu unda le a nhiel ñem inyu bibéba. Sôble yé i ñunda le a nti nyemede nkikip i boñ sômbôl Isañ. (Lôk Héber 10:5-7) Yésu a bé kapinda, ndi ngéda i nkola nano le a bôdôl nson Isañ nu ngii a bi om nye i boñ. Baa, u nhoñol le Yôhanes a mbem le hélha jam i bôña ngéda sôble i Yésu?

Yôhanes a ga tila le: “Nu a bi ep me i sôble bôt ikété malép a bi kal me le: ‘Nu ni nu u ntehe mbuu mpubi u nsôs, u yén i ngii yé, nyen a nsôble ni mbuu mpubi.’” (Yôhanes 1:33) Yôhanes a bé bem ni le mbuu u Djob u sôs i ngii mut wada a bé lama sôble. Jon di nla kal le, i ngéda Yésu a bé pam malép, Yôhanes a bé bé nhelek i tehe “mbuu Nyambe u nsôs kiki hibeñ, u lo i ngii [Yésu].”​—Matéô 3:16.

Ndi, i sôble i Yésu, jam lipe li mbôña. ‘Ngii i nyiblana’ Yésu. Hala a nkobla le kii? Bebek hala a nkobla le i ngéda sôble i Yésu, mam ma niñ yé ngéda a bé i ngii, ma bi lo nye mahoñol.  Nano Yésu a bé le a bigda niñ yé kiki man Yéhôva nu mbuu. A bé ki le a hoñol mam momasôna Djob a bi niiga nye i ngii ilole a nlo hana isi.

Jam lipe li yé le, i sôble i Yésu, kiñ i bi lôl i ngii, i kalak le: “Man wem nunu, nugwéha wem, a nlémél me.” (Matéô 3:17) Kiñ i njee i? I nla bé ba kiñ i Yésu inyule a yé ha ipañ Yôhanes. Kiñ Djob i. Ibabé pééna, Yésu a yé Man Djob. A ta bé Djob nyemede.

Di nla kal le ngéda Yésu a bé hana isi, a bé man Djob, nlélém kiki Adam mut binam nu bisu a bé. I mbus le Lukas a mpôdôl inyu sôble i Yésu, a ntila le: “I ngéda [Yésu] a bi bôdôl nson wé, a bééna jam kii bo môm maa ma nwii, a bak, kii bôt ba bé hoñol, man Yôsep, man Héli, . . . man David, . . . man Abraham, . . . man Nôa, . . . man Adam, man Nyambe.”​—Lukas 3:23-38.

Nlélém kiki Adam mut binam a bé “man Djob,” hala nyen yak Yésu a yé. Ni sôble yé, Yésu a bi bana maada ma mondo ni Djob, a yila Man mbuu nu Djob. Ni njel i, Yésu a nla niiga maliga ma Djob, ni unda bôt njel i nkena niñ. Ibôdôl ha ngéda i, Yésu a mbôdôl niñ i i bé lama kena nye i sem nom yé kiki sesema inyu bikwéha bi bôt.