Hira-hira onom bulan dung marbarita si Johannes Pandidi, didapothon Jesus ma ibana tu Sunge Jordan. Hira-hira 30 taon ma umur ni Jesus tingki i. Ndang na laho mangkata-hatai manang laho mangida ulaon ni si Johannes ibana ro. Alai, dipangido Jesus do tu si Johannes asa tardidi ibana.

Ndang olo si Johannes mandidihon Jesus. Ninna ma, “Ahu do nian na ingkon didionmu, boasa gabe ro ho tu ahu?” (Mateus 3:14) Diboto ibana do molo Jesus i Anak ni Debata. Molo taingot muse, manggunjal do si Johannes di butuha ni omakna tingki ro si Maria mandapothon si Elisabet. Tontu dipaboa si Elisabet do i tu si Johannes. Diboto si Johannes do muse taringot tu suru-suruan na paboahon naung tubu Jesus, dohot taringot tu angka suru-suruan na niida ni angka parmahan i.

Diboto si Johannes do na so mardosa Jesus. Hape, tu halak naung muba sian dosa do pandidionna i. Ala ndang olo si Johannes, didok Jesus ma, “Songon i ma jolo saonari, na mangulahon na sintong do hita disi.”​—Mateus 3:15.

Boasa ingkon tardidi Jesus? Jesus tardidi, ndang na laho patuduhon naung muba ibana sian dosa. Alai, pandidionna i patuduhon naung dilehon ibana dirina laho mangulahon lomo ni roha ni Debata. (Heber 10:5-7) Andorang so tardidi, tukang hau do Jesus. Alai mulai saonari, ulahononna ma ulaon na nilehon ni Amana na di surgo i di tano on. Didok rohamuna, hirim do roha ni si Johannes mangida tanda halongangan tingki tardidi Jesus?

Didok si Johannes ma, “Debata na marsuru ahu asa mandidihon dohot aek, mandok tu ahu, ‘Molo diida ho turun tondi parbadia jala songgop tu atas ni sasahalak, ibana ma na laho mandidihon dohot tondi parbadia.’” (Johannes 1:33) Taboto ma, hirim do rohana songgop tondi parbadia tu sahalak sian na tardidi dibahen ibana. Alani i, tingki kaluar Jesus sian aek, ndang songgot be rohana tingki diida  ibana “tondi parbadia ni Debata na songon darapati ro tu ginjang ni Jesus”.​—Mateus 3:16.

Adong dope tanda na asing na masa tingki Jesus tardidi. Tompu ma ‘bungka langit’ diida ibana. Aha do lapatanna? Dung tardidi, diingot Jesus ma muse hangoluanna tingki di surgo. Na hea ibana gabe suru-suruan di surgo tingki rap dohot Amana Jahowa. Diingot ma muse sude hasintongan na niajarhon ni Amana tu ibana, andorang so ro tu tano on.

Tingki tardidi Jesus, adong ma soara sian surgo mandok, “On do Anakku, haholonganki, halomoan ni rohangku do ibana.” (Mateus 3:17) Soara ni ise do i? Tontu ndang soara ni Jesus, ai rap do ibana tingki i dohot si Johannes. Alani i, soara ni Debata do i. Tangkas ma, Jesus i ndang Debata, alai Anak ni Debata do ibana.

Nang pe gabe jolma Jesus di tano on, alai anak ni Debata do ibana dos songon si Adam jolma na parjolo i. Dung dipaboa taringot tu pandidion ni Jesus, disurat si Lukas ma, “Hira-hira 30 taon ma umur ni Jesus tingki dipungka ibana ulaonna. Mangihuthon pandapot ni angka halak, ibana anak ni si Josep, anak ni si Heli, . . . anak ni si Daud, . . . anak ni si Abraham, . . . anak ni si Noak, . . . anak ni si Adam, anak ni Debata.”​—Lukas 3:23-38.

Dos songon si Adam, didok do Jesus “anak ni Debata”. Dung tardidi, diboto Jesus ma molo ibana Anak ni Debata jala na laho gabe suru-suruan do ibana muse di surgo. Alani i, Jesus ma na dumenggan mangajarhon hasintongan taringot tu Debata jala na patuduhon dalan hangoluan tu hita. Saonari, nunga rade Jesus mamungka ulaonna marbarita. Jala, lehononna ma hosana gabe pelean humongkop sude jolma na mardosa.