Mga anom na bulan pakapuon ni Juan Bautista na maghulit, si Jesus, na mga 30 anyos na ngunyan, nagdulok sa saiya sa Salog nin Jordan. Sa anong dahilan? Bako iyan basta ordinaryo sanang pagdalaw. Bako man ini dahil sa gusto sanang hilingon ni Jesus kun paano nag-uuswag an gibuhon ni Juan. Dai, nagduman si Jesus para magpabawtismo ki Juan.

Natural sanang magsayuma si Juan: “Ako an kaipuhan na bawtismuhan mo, tapos ika pa lugod an minadigdi sa sakuya?” (Mateo 3:14) Aram ni Juan na si Jesus espesyal na Aki nin Diyos. Tandaan na kan si Juan nasa matris pa kan saiyang ina, napalukso siya sa kaugmahan kan si Maria, na bados kaidto ki Jesus, nagdalaw sa saiyang ina na si Elizabeth. Daing duda na pag-abot nin panahon iinistorya ini ki Juan kan saiyang ina. Asin naaraman man niya an manungod sa sinabi kan anghel ki Maria na ipapangaki kaini si Jesus asin an manungod sa mga anghel na nagpahiling sa mga pastor kan banggi na mamundag si Jesus.

Nasasabutan ni Juan na an ginigibo niyang bawtismo para sa mga nagsusulsol kan saindang mga kasalan. Pero si Jesus daing kasalan. Sa ibong kan pagsayuma ni Juan, nag-insistir si Jesus: “Pabayaan mong mangyari ini ngunyan, huli ta sa paaging ini maninigo niyatong isagibo an gabos na bagay na matanos.”—Mateo 3:15.

Taano ta angay na bawtismuhan si Jesus? An bawtismo ki Jesus bako man simbolo nin pagsulsol kan mga kasalan kundi pagpahiling na ipinepresentar niya an saiyang sadiri para gibuhon an kabutan kan saiyang Ama. (Hebreo 10:5-7) Nagin karpintero si Jesus, pero ngunyan panahon na para punan niya an ministeryo na isinugo sa saiya kan saiyang makalangit na Ama na gibuhon digdi sa daga. Sa hiling mo daw may inaasahan si Juan na pambihirang mangyayari pag binawtismuhan niya si Jesus?

Buweno, pakalihis kaini, nagsabi si Juan: “Siya mismo na nagsugo sa sakuya na magbawtismo sa tubig nagsabi sa sako: ‘An siisay man na mahiling mong sa saiya nagbababa asin nagdadanay an espiritu, ini an saro na mabawtismo sa banal na espiritu.’” (Juan 1:33) Kaya inaasahan ni Juan na an espiritu nin Diyos mababa sa saro na babawtismuhan niya. Huli kaini, pag naghawas na si Jesus sa tubig, puwedeng dai man magngalas si Juan sa mahihiling niyang “espiritu nin Diyos na nagbababa na arog nin salampati asin pasiring [ki Jesus].”—Mateo 3:16.

Pero urog pa diyan an nangyari kan bawtismuhan si Jesus. “Nabuksan an kalangitan” sa saiya. Ano an  buot sabihon kaini? Posibleng marhay na nangangahulugan ini na kan bawtismuhan si Jesus, nagbalik sa memorya niya an saiyang buhay sa langit bago siya nagin tawo. Kaya, nagigirumduman na ngunyan ni Jesus an saiyang buhay bilang espiritung aki ni Jehova, pati na an mga katotoohan na itinukdo sa saiya nin Diyos duman sa langit bago siya nagdigdi sa daga.

Saro pa, kan bawtismuhan si Jesus, sarong boses hali sa kalangitan an nagsabi: “Ini an sakuyang Aki, an namumutan, na sakong inuuyunan.” (Mateo 3:17) Kiisay na boses idto? Dai puwedeng boses idto ni Jesus huli ta kaibanan siya mismo ni Juan. Boses idto nin Diyos. Malinaw nanggad, si Jesus Aki nin Diyos. Bako siya an Diyos.

Mahalagang mangnuhon na si Jesus sarong tawong aki nin Diyos, arog kan inot na tawong si Adan. Pagkatapos isaysay an pagbawtismo ki Jesus, an disipulong si Lucas nagsurat: “Kan punan ni Jesus an saiyang gibuhon, mga 30 anyos siya, asin sigun sa pinaniniwalaan, siya an aki ni Jose, na aki ni Heli, . . . na aki ni David, . . . na aki ni Abraham, . . . na aki ni Noe, . . . na aki ni Adan, na aki nin Diyos.”—Lucas 3:23-38.

Kun paanong si Adan sarong tawong “aki nin Diyos,” iyo man si Jesus. Kan bawtismuhan si Jesus, naglaog siya sa sarong bagong relasyon sa Diyos—siya nagin espirituwal na Aki nin Diyos. Kaya, nasa posisyon si Jesus na itukdo an katotoohan gikan sa Diyos asin ipahiling an dalan pasiring sa buhay. Pinunan na ni Jesus an sarong dalan na masagkod sa pagtao kan saiyang buhay bilang atang para sa makasalan na katawuhan.