Pa numa ya myeshi nalimo 6 ukutula apo Yohane Kabatisha atendekeele ukushimikila, Yesu aile kuli Yohane uwali ku Mumana wa Yordani. Pali iyi nshita, Yesu aali ne myaka nalimo 30. Cinshi ailiile kuli Yohane? Taile mu kumutandalila nelyo mu kumona ifyo umulimo alebomba wale-enda, lelo aile ku kweba Yohane ukuti amubatishe.

Yohane alikeene kabili amwebele ati: “Ni we ufwile ukumbatisha, kabili ni we wise kuli ine?” (Mateo 3:14) Yohane alishibe ukuti Yesu Mwana wa kwa Lesa uwaibela. Ibukisheni ukuti ilyo Yohane ali mwi fumo lya kwa nyina, alicilawike ku nsansa ilyo Maria uwali ne fumo lya kwa Yesu atandalile Elisabete, nyina wa kwa Yohane. Ukwabula no kutwishika, Elisabete alyebele umwana wakwe ifyacitike. Yohane afwile alishibe no kuti bamalaika balibilishe ukufyalwa kwa kwa Yesu no kuti kwali bamalaika abaile kuli bakacema ubushiku ilyo Yesu afyelwe.

Yohane aishibe ukuti abo alebatisha ni balya abalapiile pa membu balecita. Lelo Yesu ena talingile ukubatishiwa pantu tali na lubembu. Ilyo Yohane akeene ukumubatisha, Yesu amwebele ati: “Leka cibe ifi fine pali ino nshita, pantu nacilinga ifwe ukucita fyonse ifyalungama.”—Mateo 3:15.

Mulandu nshi calingiile ukuti Yesu abatishiwe? Ico Yesu abatishiwilwe te kulanga ukuti alapila pa membu shakwe. Ulubatisho lwakwe lwalangile ukuti aipeela ukucita ukufwaya kwa kwa Wishi. (AbaHebere 10:5-7) Yesu alebomba umulimo wa bukabaasa, lelo inshita yalifikile iya kuti atendeke ukubomba umulimo uo Wishi amutumiine pano calo. Bushe Yohane ale-enekela icintu icaibela ukucitika nga abatisha Yesu?

Umfweni ifyo Yohane asosele pa numa, atile: “Ulya Wine uwantumine ku kubatisha mu menshi anjebele ati, ‘Nga wamona umupashi waikila no kwikala pa muntu umo, ninshi uyo wine muntu e ukalabatishisha ku mupashi wa mushilo.’” (Yohane 1:33) Kanshi Yohane ale-enekela umupashi ukwisa pa muntu umo uo abatishe. E ico ilyo Yesu afumine mu menshi, nalimo Yohane tapapile ilyo amwene “umupashi wa kwa Lesa uleika kwati ni nkunda pali [Yesu].”—Mateo 3:16.

Lelo kwali na fimbi ifyacitike. “Umuulu waliswike.”  Bushe ici calolele mwi? Cifwile calolele mu kuti, ilyo Yesu abatishiwe, alibukishe ifyo ali ku muulu ilyo ashilaisa pano calo. E ico Yesu alibukishe ukuti ilyo ashilaisa pano calo aleikala ku muulu, kabili alibukishe ne cine ico Wishi, Yehova Lesa amusambilishe.

E lyo na lintu Yesu alebatishiwa, ishiwi ilyafumine ku muulu lyatile: “Uyu e Mwana wandi, uwatemwikwa, uo nsekelamo.” (Mateo 3:17) Ni nani walandile aya mashiwi? Te Yesu walandile, pantu ali na Yohane. Uwalandile aya mashiwi ni Lesa. Ukwabula no kutwishika, Yesu Mwana wa kwa Lesa, te Lesa iyo.

Yesu ali umuntunse, lelo ali umwana wa kwa Lesa nga filya fine Adamu ali. Pa numa ya kulondolola ifyo cali ilyo Yesu abatishiwe, Luka umusambi wa kwa Yesu alembele ukuti: “Ilyo Yesu atendeke umulimo wakwe, ali ne myaka 30, kabili caishibikwe ukuti ali ni mwana Yosefe, mwana Heli, . . . mwana Davidi, . . . mwana Abrahamu, . . . mwana Noa, . . . mwana Adamu, mwana Lesa.”—Luka 3:23-38.

Nga filya fine Adamu, umuntunse ali “mwana Lesa,” Yesu na o ali mwana wa kwa Lesa. Ilyo abatishiwe, ali-ipeele kuli Lesa kabili aishileba Umwana wa kwa Lesa uwasubwa. Kanshi Yesu e wingatusambilisha icine icafuma kuli Lesa, kabili e wingatutungulula ku mweo. E ico ilyo Yesu abatishiwe, atendeke ukucita ifyalengele atuule ubumi bwakwe pa kuti abantunse ababembu bakalubuke.