Den a nga ke ngon ésaman ane Jean Baptiste a bo ésaé jé. Yésus a mbili bebé mimbu 30, nde a zu koone Jean Ôsôé ya Jourdain. Amu jé? A nji so ve na a zu bo Jean zezé njoman, nge ke fas aval avé ésaé jé ja wulu. Teké’é, Yésus a zu sili Jean na a du nye.

Bi ne wô’ô na Jean a kam a jô na: “Ke ma ma yiane duban e be wo, ye wo wo viane zu be ma?” (Matthieu 3:14, Mfefé Nkôñelan) Jean a yeme na Yésus a ne Mone Zambe. Bia beta simesane na, éyoñ a mbe abume be nyia wé Élisabeth, Jean a nga vak éyoñe Marie a nga zu jome nyia wé a to abum. Teke vaa nge beté, mvuse ya valé, nyia Jean a nga yiane nye kañete jam ete. A Jean a nga yiane fe wô’ô na, Gabriel a nga kate Marie na a ye biaé Yésus, a na beange befe be nga yené be beba’ale mintômba alu Yésus a nga bialé.

Jean a yeme na, mbaptizô a bo ô ne asu bôte ba jôban abé dap. Ve Yésus a nji bo abé môs éziñ. Akusa bo Jean a ben, Yésus a yemete nye a jô’ô na: “Tame jibi bo éyoñe ji: amu nalé bi ayiane bo mam mese me ne zôsô.”​—Matthieu 3:15.

Nde amu jé Yésus a duban? Yésus a nji duban amu a kômbô jôban abé éziñ. Nduane wé ô ne ndeme ja liti na, a ve émiene ngumba asu ya na a bo nkômban Ésa wé. (Behébreu 10:5-7) Yésus a mbe kafinda, ve éyoñe ji, é nga sili na a taté ésaé Ésa wé ya yôp été a nga lôme nye na, a zu bo si va. Ye wo simesane na Jean a yange na jam éziñ é boban éyoñ a du Yésus?

Jean émien a jô na: “Môt a nga lôme ma me baptizô bôt a mendim, nnye a nga jô me na, Môt wo aye yen nsisim ô sisik, ô tabe’ be nye, nnye a ne môt a ye baptizô bôt a mbamba nsisim.” (Jean 1:33) Nde, Jean a yange na nsisime Zambe ô sis e be môte wua ya ba a du. Nde éyoñe Yésus a so mendim été, Jean a nji kam éyoñ a yene “nsisime Zambe ô sisik aval ane zum, ô za’a be nye [Yésus].”​—Matthieu 3:16.

Ve jam afe da boban éyoñe Yésus a duban. ‘Yôp da yombô asu dé.’ Nalé a tinan aya? Nalé a yiane tinane na, éyoñe Yésus a duban, mam  mese a nga bo éyoñ a mbe yôp été ma beta nye so ôsimesan été. Éyoñe ji, Yésus a beta simesan éyoñ a mbe mone Yéhôva a nyule nsisim, a simesane fe benya mejôô Zambe a nga ye’ele nye éyoñ a mbe yôp été ôsusua na a zu si.

Jam afe e ne na, éyoñe Yésus a duban, tyiñe ja so yôp, é jô’ô na: “Nyôna a ne mone wom ma dañe nye’e me bili mevak e be nye.” (Matthieu 3:17, Mfefé Nkôñelan) Tyiñe za le? E vo’o bo tyiñe Yésus; ke ba Jean be too! Tyiñ éte é ne nyi Zambe. Nalé a liti ne ngeññ na, Yésus a ne Mone Zambe. A nji bo nya Zambe émien.

Bi ne ñhe ba’ale na, éyoñ a mbe si va, Yésus a mbe mone Zambe a nyule môta binam, fo’o ve ane Adam a mbe ôsusua. Éyoñ a maneya kañete aval avé Yésus a nga duban, nlômane Luc wo tili na: ‘Yésus a nga bili mimbu bebé mewôm mela éyoñ a nga taté ésaé jé. Bôt be nga simesane na a mbe mone Yôsep, Yôsep mone Héli, . . . mone David, . . . mone Abraham, . . . mone Noé, . . . mone Adam, Adam mone Zambe.’​—Luc 3:23-38, Mfefé Nkôñelan.

Yésus a ne fo’o “mone Zambe,” aval ane Adam a mbe. Éyoñe Yésus a nga duban, a nga yemelane na a ne Mone Zambe a na, a ye bo nsisim yôp été. Nde ñhe, Yésus a nto ngule ya ye’ele benya mejôô ma so be Zambe, a liti bôte zene ya ényiñ. Yésus a taté fatan ényiñ ja ye su’ulane bo na, a ve émien ane metuna’a asu na a kôté bôte mfa’a ya abé.