Be ni Yohane Baptisilɔ lɛ bɔi shiɛmɔ lɛ sɛɛ aaafee nyɔji ekpaa lɛ, Yesu, ní amrɔ nɛɛ eye aaafee afii 30 lɛ ba eŋɔɔ yɛ Yordan Faa lɛ naa. Mɛni hewɔ? Jeee ni ebasara lɛ kɛkɛ, tamɔ mɔ saraa enaanyo lɛ. Asaŋ, jeee akɛ Yesu miitao ena bɔ ni Yohane nitsumɔ lɛ yaa nɔ ehãa kɛkɛ. Moŋ lɛ, Yesu ba koni Yohane abaptisi lɛ.

Shishinumɔ yɛ he akɛ Yohane tsĩ enaa ni ewie akɛ: “Mi moŋ ní ehia akɛ obaptisiɔ mi lɛ, ni bo obaa miŋɔɔ nɛɛ?” (Mateo 3:14) Yohane le akɛ Nyɔŋmɔ Bi ni eshwɛɛɛ ehe kwraa ji Yesu. Kaimɔ akɛ, be ni Yohane yɔɔ enyɛ Elizabet musuŋ, ní Maria ni no mli lɛ ehiɛ Yesu musu lɛ yasara lɛ lɛ, Yohane huru kɛ miishɛɛ yɛ enyɛ musuŋ. Ŋwanejee ko bɛ he akɛ, sɛɛ mli lɛ, Yohane nyɛ gba lɛ enɛ. Ni eeenyɛ efee akɛ, agba lɛ bɔ ni ŋwɛibɔfo lɛ gba Yesu fɔmɔ lɛ efɔ̃ shi, kɛ agbɛnɛ hu, ŋwɛibɔfoi lɛ ni yajie amɛhe kpo amɛtsɔɔ tookwɛlɔi lɛ gbi gbɛkɛ ni afɔ Yesu lɛ.

Yohane le akɛ, mɛi ni etsake amɛtsui yɛ amɛhe eshai lɛ ahe lɛ ebaptisiɔ. Kɛ̃lɛ, esha ko bɛ Yesu he. Yɛ Yesu naa ni Yohane tsĩ lɛ fɛɛ sɛɛ lɛ, Yesu ma nɔ mi akɛ: “Be nɛɛ mli lɛ, kpɛlɛmɔ nɔ, ejaakɛ enɛ ji gbɛ ni sa ni wɔbaatsɔ nɔ wɔgbe jalɛ fɛɛ naa.”​—Mateo 3:15.

Mɛni hewɔ eja gbɛ akɛ abaabaptisi Yesu lɛ? Jeee Yesu tsui ni etsake kɛjɛ ehe eshai ahe lɛ he okadi ebaptisimɔ lɛ feɔ. Ebaptisimɔ lɛ tsɔɔ akɛ, ekɛ ehe miihã akɛ ebaafee e-Tsɛ lɛ suɔmɔnaa nii. (Hebribii 10:5-7) No mli lɛ, kapintafonyo ji Yesu, shi amrɔ nɛɛ be eshɛ ni ekɛbaaje nitsumɔ ni e-Tsɛ ni yɔɔ ŋwɛi lɛ tsu lɛ kɛba shikpɔŋ lɛ nɔ akɛ ebatsu lɛ shishi. Ani osusuɔ akɛ Yohane miikpa gbɛ akɛ nɔ ko krɛdɛɛ ko baaya nɔ be ni ebaptisiɔ Yesu lɛ?

Sɛɛ mli lɛ, Yohane bɔ amaniɛ akɛ: “Mɔ tuuntu ni tsu mi akɛ mibabaptisi yɛ nu mli lɛ kɛɛ mi akɛ: ‘Mɔ fɛɛ mɔ ni obaana akɛ mumɔ lɛ miikpeleke shi kɛmiiba enɔ, ni ehiɔ enɔ lɛ, mɔ nɛ ji mɔ ni baptisiɔ yɛ mumɔ krɔŋkrɔŋ mli lɛ.’” (Yohane 1:33) No hewɔ lɛ, Yohane miikpa gbɛ akɛ Nyɔŋmɔ mumɔ lɛ baaba mɛi ni ebaptisiɔ lɛ ateŋ mɔ ko nɔ. Enɛ hewɔ lɛ, efeee Yohane naakpɛɛ akɛ ena “Nyɔŋmɔ mumɔ lɛ miikpeleke shi tamɔ okpo ni eeba [Yesu nɔ]” be ni Yesu jɛ nu lɛ mli eje kpo lɛ.​—Mateo 3:16.

 Shi jeee enɛ pɛ ji nɔ ni ba be ni abaptisi Yesu lɛ. ‘Agbele ŋwɛi naa’ hu ahã lɛ. Mɛni enɛ tsɔɔ? Eeenyɛ efee akɛ, no tsɔɔ akɛ be ni abaptisi Yesu lɛ, akɛ shihilɛ mli ni eyɔɔ yɛ ŋwɛi dani abafɔ lɛ akɛ adesa lɛ he nilee duro lɛ ekoŋŋ. Enɛ hã Yesu kai shihilɛ mli ni no mli lɛ eyɔɔ akɛ Yehowa mumɔŋ bi lɛ agbɛnɛ, ni anɔkwalei ni Nyɔŋmɔ tsɔɔ lɛ yɛ ŋwɛi dani eba shikpɔŋ lɛ nɔ lɛ fata he.

Kɛfata he lɛ, be ni abaptisi Yesu lɛ, gbee ko jɛ ŋwɛi kɛɛ akɛ: “Mɔ nɛ ji mi-Bi ni misumɔɔ lɛ lɛ, mɔ ni mikpɛlɛ enɔ lɛ.” (Mateo 3:17) Namɔ gbee ni? Enyɛŋ efee Yesu diɛŋtsɛ gbee; no mli lɛ ekɛ Yohane yɔɔ jɛmɛ. Nyɔŋmɔ gbee ni. Enɛ tsɔɔ faŋŋ akɛ, Nyɔŋmɔ Bi ji Yesu. Jeee Yesu ji Nyɔŋmɔ.

Esa kadimɔ akɛ, Yesu ji adesa, tsɛ eji Nyɔŋmɔ bi, tamɔ bɔ ni klɛŋklɛŋ gbɔmɔ, ni ji Adam lɛ ji lɛ. Be ni kaselɔ Luka wie Yesu baptisimɔ lɛ he sɛɛ lɛ, ewie akɛ: “Be ni Yesu je enitsumɔ lɛ shishi lɛ, eye aaafee afii nyɔŋmai etɛ, ni tamɔ bɔ ni asusuɔ lɛ, eji Yosef bi, Heli bi, . . . David bi, . . . Abraham bi, . . . Noa bi, . . . Adam bi, Nyɔŋmɔ bi.”​—Luka 3:23-38.

Taakɛ Adam ji adesa, tsɛ eji ‘Nyɔŋmɔ bi’ lɛ, nakai nɔŋŋ Yesu hu ji. Be ni abaptisi Yesu lɛ, wekukpaa hee ko bakã ekɛ Nyɔŋmɔ teŋ, ni ebatsɔ Nyɔŋmɔ mumɔŋ Bi hu. No hewɔ lɛ, Yesu baanyɛ atsɔɔ mɛi anɔkwalei ni jɛ Nyɔŋmɔ ŋɔɔ kɛ gbɛ ni kɛ mɔ yaa wala mli lɛ hu. Yesu miikɔ gbɛ ko ni baahã sɛɛ mli lɛ ekɛ ewala akɛ adesa lɛ aŋmɛ shi akɛ afɔle ehã adesai eshafeelɔi.