Osun ṣidopo to whenue Johanu Baptizitọ ko jẹ yẹwhehodọ ji godo, Jesu he tindo nudi owhe 30 todin wá e dè to Tọ̀sisa Jọdani tọn tó. Etẹwutu? E ma yin nado wá dla ẹ pọ́n poun wutu gba. Mọjanwẹ Jesu ma wá nado pọ́n lehe azọ́n Johanu tọn to yìyì do. Amọ́, Jesu wá nado biọ dọ Johanu ni baptizi emi.

E ma yin nupaṣamẹ de dọ Johanu gbẹ́ bo dọmọ: “Yẹn wẹ tindo nuhudo nado yin bibaptizi gbọn hiẹ dali, bọ hiẹ ka to dè e wá?” (Matiu 3:14) Johanu yọnẹn dọ Jesu wẹ yin Visunnu vonọtaun Jiwheyẹwhe tọn. Flindọ to whenue Johanu gbẹ́ pò to ohò onọ̀ etọn tọn mẹ, e whàngo po ayajẹ daho po, to whenue Malia he to ohò Jesu tọn wá dla onọ̀ etọn Elizabẹti pọ́n. Matin ayihaawe, onọ̀ Johanu tọn dọhona ẹn to nukọn mẹ gando nujijọ ehe go. Podọ ewọ na ko sèhó gando angẹli he lá jiji Jesu tọn po awhànpa angẹli lẹ tọn he sọawuhia lẹngbọhọtọ lẹ to ozán he mẹ e yin jiji te po go.

Johanu mọnukunnujẹemẹ dọ baptẹm he basi emi te tin na mẹhe lẹnvọjọ sọn ylando yetọn mẹ lẹ. Ṣigba, Jesu ma tindo ylando depope. Mahopọnna dọ Johanu gbẹ́, Jesu tẹkudeji dọmọ: “Gbọ e ni yì domọ todin, na mọ wẹ e jẹna mí do nado wà nuhe yin dodo lẹpo.”—Matiu 3:15.

Naegbọn e jẹ dọ Jesu ni yin bibaptizi? Baptẹm Jesu tọn ma yin dohia lẹnvọjọ sọn ylando lẹ mẹ tọn gba. Baptẹm etọn dohia dọ e to ede zejo nado wà ojlo Otọ́ etọn tọn. (Heblu lẹ 10:5-7) Whlẹpatọ wẹ Jesu yin dai, ṣigba ojlẹ lọ sọ̀ todin nado bẹ lizọnyizọn he Otọ́ olọn mẹ etọn do e hlan aigba ji nado wà lọ jẹeji. Be a lẹndọ Johanu donukun dọ onú vonọtaun de na jọ to whenue ewọ na baptizi Jesu wẹ ya?

Na taun tọn, Johanu wá dọ to nukọn mẹ dọmọ: “Omẹ lọ he do mi hlan nado yí osin do baptizi dọna mi dọ, ‘To whenue hiẹ mọ gbigbọ ja odò bosọ jẹ do mẹde ji, hiẹ ni yọnẹn dọ omẹ enẹlọ wẹ nọ yí gbigbọ wiwe do baptizi.’” (Johanu 1:33) Enẹwutu, Johanu to nukundo dọ gbigbọ Jiwheyẹwhe tọn na jẹ do mẹhe e na baptizi de ji. Podọ tlolo he Jesu tọ́n sọn otọ̀ lọ mẹ, e ma na ko paṣa Johanu nado “mọ gbigbọ Jiwheyẹwhe tọn to tejẹ ja [Jesu] ji taidi apoe de.”—Matiu 3:16.

Ṣigba, onú devo sọ jọ to baptẹm Jesu tọn whenu. “Olọn hùndonuvo” na ẹn. Etẹwẹ ehe zẹẹmẹdo?  E taidi dọ to baptẹm Jesu tọn whenu, e flin gbẹzan he e zan wayi to olọn mẹ whẹpo do wá aigba ji. Gbọnmọ dali, Jesu wá flin gbẹzan etọn taidi visunnu gbigbọmẹ tọn Jehovah tọn gọna nugbo he Jiwheyẹwhe plọn ẹn to olọn mẹ whẹpo ewọ do wá aigba ji lẹ.

Humọ, to baptẹm Jesu tọn whenu, ogbè de lá sọn olọn mẹ dọmọ: “Ehe wẹ Visunnu ṣie, mẹyiwanna lọ, mẹhe yẹn ko kẹalọyi.” (Matiu 3:17) Ogbè mẹnu tọn wẹ? E ma sọgan yin ogbè Jesu lọsu tọn; na ewọ tin to finẹ po Johanu po wutu. Ogbè Jiwheyẹwhe tọn wẹ. Na nugbo tọn, Jesu wẹ yin Visunnu Jiwheyẹwhe tọn. Ewọ ma yin Jiwheyẹwhe lọsu.

E jẹna ayidego dọ Jesu yin visunnu Jiwheyẹwhe tọn to aigba ji, kẹdẹdile sunnu tintan lọ Adam yin do wayi. To whenue devi Luku ko basi zẹẹmẹ gando baptẹm Jesu tọn go godo, e wlan dọmọ: “To whenue e bẹ azọ́n etọn jẹeji, e tindo nudi owhe 30, dile yè lẹn do, e yin visunnu Josẹfu tọn, visunnu Heli tọn, . . . visunnu Davidi tọn, . . . visunnu Ablaham tọn, . . . visunnu Noa tọn, . . . visunnu Adam tọn, visunnu Jiwheyẹwhe tọn.”—Luku 3:23-38.

Kẹdẹdile Adam he yin gbẹtọvi de yin “visunnu Jiwheyẹwhe tọn” do, mọ wẹ Jesu lọsu yin do ga. To baptẹm Jesu tọn whenu, e mọnukunnujẹemẹ dọ emi yin Visunnu Jiwheyẹwhe tọn, bo na wá lẹzun nudida gbigbọnọ de to olọn mẹ. Enẹwutu, Jesu tin to otẹn dagbe mẹ nado plọnmẹ nugbo Jiwheyẹwhe tọn, bosọ do ali he nọ planmẹ yì ogbẹ̀ mẹ lọ hia mẹ. Jesu bẹ gbẹzan yọyọ de jẹeji, ehe na wá dekọtọn do ogbẹ̀ gbẹtọvi tọn etọn yíyí do sanvọ́ do ota gbẹtọvi ylandonọ lẹ tọn mẹ.