Ioane Bapatiso be hua 6 lalonai haroro gaukara ia karaia murinai, Iesu—ena mauri lagani 30 bamona—be Ioridane Sinavai dekenai ia mai. Dahaka dainai? Turana ia vadivadi totona, a? Eiava Iesu ia ura ia itaia, Ioane ena gaukara be ia heau namonamo, a? Lasi, Iesu be Ioane ese do ia bapatisoa totona ia mai.

To Ioane ia gwau: “Oi ese lau oi bapatisoa be namo, to dahaka dainai lau dekenai oi mai?” (Mataio 3:14) Ioane ia diba Iesu be Dirava ena Natuna. Laloatao, Maria ena bogana ai Iesu ia do noho neganai, Maria ese Elisabeta ia vadivadi henia, unai nega ai Ioane be ena sinana ena bogana lalonai ia moale dainai ia marere! Reana Elisabeta ese gabeai ena natuna Ioane dekenai unai sivarai ia gwauraia. Danu Ioane ia diba, Iesu ena vara sivaraina be aneru ese ia gwauraia guna, bona Iesu ia vara hanuaboina ai aneru momo be mamoe naria taudia dekenai idia hedinarai ena sivarai ia kamonai.

Ioane ia diba ia ese kara dika amo idia helalo-kerehai taudia ia bapatisoa. To, Iesu be kara dika ta ia karaia lasi. Ena be Ioane ese ia koua, to Iesu ia gwau: “Lau oi koua lasi, badina unai dala amo Dirava ena ura karadia ibounai ita karaia diba.”​—Mataio 3:15.

Dahaka dainai Iesu ia bapatiso be maoro? Iesu ia abia bapatiso be kara dika amo idia helalo-kerehai taudia ese idia abia bapatiso bamona lasi. To, ia abia bapatiso ese ia hahedinaraia ia be sibona ia henia Tamana ena ura ia karaia totona. (Heberu 10:5-7) Guna Iesu be kapenta gaukara ia karaia, to hari ia ese haroro gaukara do ia karaia matamaia, unai be ena guba Tamana ese ia siaia tanobada ai do ia karaia gaukarana. Oi laloa Ioane ia diba Iesu ia bapatisoa neganai, hoa karana ta do ia vara, a?

Gabeai, Ioane ia gwau: “Lau ia siaia ranu lalonai bapatiso do lau karaia Tauna be lau dekenai ia gwau: ‘Do oi itaia, ia latanai lauma helaga ia diho bona ia helai, inai tauna be lauma helaga amo bapatiso do ia karaia.’” (Ioane 1:33) Unai dainai, Ioane ia diba ia bapatisoa taudia amo, idia ta ena latanai Dirava ena lauma helaga do ia diho. Vadaeni, Iesu be ranu amo ia  daekau neganai, Ioane ese “Dirava ena lauma ia itaia, pune ta bamona Iesu latanai ia diho.”​—Mataio 3:16.

To, unai sibona lasi, Iesu ia bapatiso murinai, “guba ia kehoa.” Unai ena anina be dahaka? Reana ena anina be ia bapatiso neganai ena guba maurina ia laloa lou. Danu ia laloatao ia be Iehova Dirava ena lauma natuna ta, bona guba ai Dirava ese ia hadibaia hereva momokanidia ia laloa lou.

Danu, bapatiso ia abia neganai, gado ta guba amo ia boiboi, ia gwau: “Inai be egu Natuna, egu lalokau, ia lau lalonamo henia.” (Mataio 3:17) Unai be daika ena gadona? Unai be Iesu ena gadona lasi; ia be Ioane ida ia noho. To, unai be Dirava ena gadona. Unai ese ia hamomokania Iesu be Dirava ena Natuna. Ia be Dirava lasi.

Ita abia dae Iesu be tanobada ai ia vara neganai, ia be Dirava ena natuna, tau ginigunana Adamu hegeregerena. Hahediba tauna Luka ese Iesu ena bapatiso ia herevalaia murinai, ia gwau: “Iesu ese ena gaukara ia matamaia neganai, ena mauri lagani be 30 bamona, bona taunimanima edia lalohadai be, ia be Iosepa ena natuna, Iosepa be Heli ena natuna, . . . Davida ena natuna, . . . Aberahamo ena natuna, . . . Noa ena natuna, . . . Adamu ena natuna, . . . Dirava ena natuna.”​—Luka 3:23-38.

Adamu bamona, Iesu danu be “Dirava ena natuna.” Iesu ia bapatiso neganai, ia laloparara ia be Dirava ena Natuna bona gabeai guba ai lauma tauna ai do ia lao. Unai dainai, Iesu ia hegeregere hereva momokani ia hadibaia bona mauri lao henia dalana ia hahedinaraia totona. Iesu ia bapatiso murinai iena hesiai gaukara ia hamatamaia, bona unai do ia karaia ela bona kara dika taudia totona ena mauri do ia henia.