Kĩndũ mĩeri ĩtandatũ kuuma Johana Mũbatithania ambĩrĩria kũhunjia, Jesu, ũrĩa rĩu ũrĩ na mĩaka ta 30 agoka kũrĩ we rũĩ-inĩ rwa Jorodani. Aroka kũrĩ we nĩkĩ? To kũmũceerera tu. Ningĩ Jesu ndaroka o kuona ũrĩa wĩra wa Johana ũrathiĩ na mbere. Aroka kwĩra Johana amũbatithie.

Johana akarega, akamwĩra ũũ: “Kaĩ wagĩũka kũrĩ niĩ na nĩ niĩ ndĩrabatara kũbatithio nĩwe?” (Mathayo 3:14) Johana nĩ aramenya atĩ Jesu nĩ Mũrũ wa Ngai. Ririkana atĩ rĩrĩa Johana aarĩ nda ya nyina, nĩ aambararire rĩrĩa Mariamu ũrĩa warĩ na nda ya Jesu aathire gũceerera Elizabethi nyina wa Johana. Hatarĩ nganja nyina nĩ aamwĩrire thutha-inĩ ũhoro ũcio. Ningĩ no gũkorũo nĩ aamenyete ũrĩa mũraika aamenyithanirie ũhoro wĩgiĩ gũciarũo kwa Jesu na ũhoro wĩgiĩ araika arĩa moimĩrĩire arĩithi ũtukũ ũrĩa Jesu aaciarirũo.

Johana nĩ aramenya atĩ andũ arĩa arabatithia nĩ arĩa merira mehia mao. Ĩndĩ, Jesu ndarĩ na mehia. O na gũtuĩka Johana nĩ ararega, Jesu akamwĩra: “Tiga kũngiria, tondũ na njĩra ĩyo nĩ kwagĩrĩire tũhingie maũndũ mothe ma ũthingu.”​—Mathayo 3:15.

Nĩkĩ nĩ ũndũ mwagĩrĩru Jesu abatithio? Jesu ndarabatithio nĩguo onanie atĩ nĩ erirĩte mehia. Kũbatithio gwake kũronania atĩ arerutĩra nĩguo eke wendi wa Ithe. (Ahibirania 10:​5-7) Jesu akoretwo arĩ bundi wa mbaũ, no rĩu nĩ ihinda rĩa kwambĩrĩria ũtungata ũrĩa Ithe aamũtũmire arĩ kũrĩa igũrũ arute gũkũ thĩ. Hihi nĩ ũkuona ta Johana arerĩgĩrĩra ũndũ wa mwanya wĩkĩke akĩbatithia Jesu?

Thutha ũcio, Johana akoiga ũũ: “Ũrĩa wandũmire batithanagie na maĩ aanjĩrire ũũ: ‘Mũndũ ũrĩa wee ũkona roho waikũrũka na ũikare igũrũ rĩake, ũcio nĩwe ũbatithanagia na roho mũtheru.’” (Johana 1:33) Kwoguo Johana nĩ arerĩgĩrĩra roho wa Ngai ũũke igũrũ rĩa ũmwe wa arĩa arabatithia. Nĩ ũndũ ũcio, Jesu oima maĩ-inĩ, Johana ndekũmaka ona “roho wa Ngai ũgĩikũrũka ũhaana ta ndutura ũgĩũka igũrũ rĩa [Jesu].”​—Mathayo 3:16.

No ũndũ ũngĩ ũgekĩka Jesu akĩbatithio. ‘Igũrũ rĩkahingũka’ nĩ ũndũ wake. Ũndũ ũcio ũkonania  atĩa? Atĩ no kũhoteke Jesu akĩbatithio, akaririkana ũtũũro ũrĩa aarĩ naguo kũrĩa igũrũ. Jesu akaririkana ũtũũro wake wa kĩĩroho arĩ mũriũ wa Jehova, o hamwe na ma iria Ngai aamũrutĩte mbere ya okĩte gũkũ thĩ.

Hamwe na ũguo, Jesu akĩbatithio mũgambo ũkoima igũrũ ũkoiga: “Ũyũ nĩ Mũrũ wakwa, ũrĩa nyendete mũno.” (Mathayo 3:17) Mũgambo ũcio nĩ wa ũ? Ndũngĩkorũo ũrĩ wa Jesu, tondũ arĩ hau hamwe na Johana. Mũgambo ũcio nĩ wa Ngai. Hatarĩ nganja Jesu nĩ Mũrũ wa Ngai, no tiwe Ngai.

Jesu arĩ gũkũ thĩ aarĩ mũrũ wa Ngai o ta ũrĩa mũndũ wa mbere Adamu aarĩ. Thutha wa gũtaarĩria ũbatithio wa Jesu, mũrutwo Luka aandĩkire ũũ: “Rĩrĩa Jesu aambĩrĩirie wĩra wake, aarĩ wa mĩaka ta mĩrongo ĩtatũ, na ta ũrĩa andũ aingĩ meciragia, aarĩ mũrũ wa Jusufu, mũrũ wa Heli, . . . mũrũ wa Daudi, . . . mũrũ wa Iburahimu, . . . mũrũ wa Nuhu, . . . mũrũ wa Adamu, mũrũ wa Ngai.”​—Luka 3:​23-38.

O ta ũrĩa Adamu aarĩ “mũrũ wa Ngai,” no taguo Jesu aatariĩ rĩrĩa aarĩ gũkũ thĩ. Jesu abatithio, akagĩa na ũkuruhanu mwerũ hamwe na Ngai, agatuĩka Mũrũ wa Ngai wa kĩĩroho. Nĩ ũndũ ũcio, Jesu nĩ mwagĩrĩru kũrutana ũhoro ũrĩa wa ma na kuonia andũ njĩra ya muoyo. Jesu akambĩrĩria ũtũũro ũrĩa thutha-inĩ ũkaarigĩrĩria na kũruta muoyo wake ũrĩ igongona nĩ ũndũ wa mehia ma andũ.