12-تاراۋ
يسا شومىلدىرۋ راسىمىنەن ٶتتى
ماتاي 3:13—17 مارقا 1:9—11 لۇقا 3:21، 22 جوحان 1:32—34
-
يسا شومىلدىرۋ راسىمىنەن ٶتتى جانە مايلاندى
-
ەحوبا يسانى ٶزىنىڭ ۇلى ەكەنىن جاريالادى
شومىلدىرۋ ٴراسىمىن جاساۋشى جاقيانىڭ ۋاعىزداپ جۇرگەنىنە 6 ايداي ۋاقىت ٶتتى. يسا قازىر شامامەن 30 جاستا. ول يوردان وزەنىنىڭ ماڭىندا جۇرگەن جاقياعا كەلدى. نە ٷشىن؟ دوسىنا جولىعۋ ٷشىن بە؟ الدە جاقيانىڭ قىزمەتى قالاي ٴجۇرىپ جاتقانىن كورۋ ٷشىن بە؟ جوق، يسا جاقيانىڭ قولىنان شومىلدىرۋ راسىمىنەن ٶتۋ ٷشىن كەلدى.
سوندا جاقيا قارسىلىق ٴبىلدىرىپ: «ٴسىزدىڭ ماعان كەلگەنىڭىز قالاي، قايتا، مەن ٴسىزدىڭ قولىڭىزدان شومىلدىرۋ راسىمىنەن ٶتۋىم كەرەك قوي؟»— دەدى (ماتاي 3:14). مۇنىسى تۇسىنىكتى دە، ويتكەنى جاقيا يسانىڭ قۇدايدىڭ ەرەكشە ۇلى ەكەنىن ٴبىلدى. ەسىڭىزدە مە، يساعا جۇكتى بولعان ٴماريام كىرىپ كەلگەندە، ەلىزابەتتىڭ قۇرساعىندا جاتقان جاقيا تىپىرلاپ كەتىپ ەدى عوي. بۇل وقيعانى وعان اناسى ەلىزابەت ايتىپ بەرگەنى ٴسوزسىز. سونداي-اق جاقيا پەرىشتەنىڭ يسانىڭ تۋىلاتىنىن حابارلاعانىن جانە ول تۋىلعان ٴتۇنى پەرىشتەلەردىڭ قويشىلارعا كورىنگەنىن دە ەستىگەن بولۋ كەرەك.
جاقيا شومىلدىرۋ ٴراسىمى كۇنالارىنا وكىنەتىن ادامدارعا ارنالعانىن، ال يسانىڭ كۇناكار ەمەس ەكەنىن بىلەدى. ٴبىراق ونىڭ قارسىلىعىنا قاراماستان، يسا: «قازىر وسىلاي بولسىن، ويتكەنى قۇدايدىڭ بار قالاۋىن جۇزەگە اسىرعانىمىز ابزال»،— دەدى (ماتاي 3:15).
يسا نەگە شومىلدىرۋ راسىمىنەن ٶتتى؟ ول شومىلدىرۋ راسىمىنەن كۇناعا وكىنگەنىنىڭ ەمەس، اكەسىنىڭ ەركىن ورىنداۋعا كىرىسكەنىنىڭ بەلگىسى رەتىندە ٶتتى (ەۆرەيلەرگە 10:5—7). بۇعان دەيىن يسا اعاش ۇستاسى بولىپ ەڭبەك ەتكەن. ەندى، ونىڭ كوكتەگى اكەسى تاپسىرعان جەردەگى ٸستى اتقاراتىن ۋاقىتى كەلىپ جەتتى. جاقيا يسانىڭ شومىلدىرۋ ٴراسىمى كەزىندە ەرەكشە جايت ورىن الادى دەپ كۇتتى مە؟
كەيىنىرەك جاقيا بىلاي دەپ ايتتى: «سۋعا شومىلدىرۋ ٴراسىمىن ورىنداۋعا جىبەرگەن قۇداي ماعان: —كيەلى رۋحتىڭ كوكتەن ٴتۇسىپ، كىمگە قونعانىن كورسەڭ، مىنە، سول كيەلى رۋحپەن شومىلدىرادى،— دەگەن ەدى» (جوحان 1:33). دەمەك، جاقيا شومىلدىرۋ ٴراسىمى كەزىندە قۇداي رۋحىنىڭ بىرەۋگە قوناتىنىن بىلگەن. سوندىقتان سۋدان شىققان يساعا «قۇداي رۋحىنىڭ كوگەرشىن ىسپەتتى ٴتۇسىپ كەلە جاتقانىن» كورگەندە، جاقيا تاڭعالمادى.
يسا شومىلدىرۋ راسىمىنەن وتكەندە، بۇدان باسقا دا جايت ورىن الدى. اتاپ ايتقاندا، يساعا «كوك اشىلدى». بۇل نەنى بىلدىرەدى؟ يسا شومىلدىرۋ راسىمىنەن وتكەن ساتتە، ونىڭ جەرگە ادام بولىپ كەلمەي تۇرعانداعى ٶمىرى جادىنا قايتارىلعانىن بىلدىرسە كەرەك. سوندىقتان ەحوبانىڭ رۋحاني ۇلى رەتىندەگى ٶمىرى مەن قۇدايدىڭ ۇيرەتكەن شىندىقتارى تۇگەل ونىڭ ەسىنە ٴتۇستى.
سونداي-اق يسا شومىلدىرۋ راسىمىنەن وتكەندە، كوكتەن: «بۇل — مەنىڭ سۇيىكتى ۇلىم. مەن وعان ريزامىن!»— دەگەن داۋىس ەستىلدى (ماتاي 3:17). بۇل كىمنىڭ داۋسى؟ يسانىڭ داۋسى بولۋى مۇمكىن ەمەس، ويتكەنى ول جاقيانىڭ قاسىندا تۇردى. بۇل — قۇدايدىڭ داۋسى. دەمەك، يسا قۇداي ەمەس، قۇدايدىڭ ۇلى.
كوڭىل قويارلىق ٴبىر جايت، يسا ادام اتا سياقتى قۇدايدىڭ ادامي ۇلى بولدى. شاكىرت لۇقا يسانىڭ شومىلدىرۋ ٴراسىمى جايلى ايتقان سوڭ، بىلاي دەگەن: «يسا قىزمەتىن باستاعاندا، شامامەن 30 جاستا ەدى. جۇرتتىڭ ويىنشا، يسا ٴجۇسىپتىڭ... ەلىنىڭ،.. ٴداۋىتتىڭ... نۇحتىڭ... ادامنىڭ، ال ادام قۇدايدىڭ ۇلى ەدى» (لۇقا 3:23—38).
ادام اتا «قۇدايدىڭ ۇلى» بولعانداي، يسا دا قۇدايدىڭ ۇلى. ٴبىراق يسا شومىلدىرۋ راسىمىنەن وتكەندە، قۇدايدىڭ رۋحاني ۇلى بولىپ، ارالارىندا ەرەكشە قارىم-قاتىناس ورنادى. وسىلاي قۇدايدىڭ شىندىعىن ۇيرەتىپ، ومىرگە جول كورسەتە الاتىن بولدى. سونداي-اق ول كۇناكار ادامزات ٷشىن ادامي ٶمىرىن قۇربان ەتەتىن جولعا قادام باستى.
