Vioka ngonde sambanu vava Yoane wa Mvubi kayantikidi longa, Yesu ona wina ye mvu 30 wizidi kwa yandi vana Nkoko a Yodani. Ekuma kezidi? Kezidi zaya mavimpi ma Yoane ko. Nga lunungunuku lwa salu kia Yoane kezidi zaya? Nkatu, Yesu wizidi kwa Yoane kimana kamvuba.

Kansi, Yoane unyuvuidi vo: “Omono kwa ngeye mfwete vubwa, owau ongeye kwa mono okwizange?” (Matai 3:14) Yoane ozeye wo vo Yesu i Mwan’a Nzambi. Sungamena dio vo vava kakala muna vumu kia Elisabete wa ngudi andi, Yoane wanikuka ye kiese vava ngudi andi kakingulwa kwa Maria ona wakakala ye vumu kia Yesu. Ka lukatikisu ko vo Elisabete wazayisa diambu diadi kwa Yoane. Nanga wazayiswa mpe nsangu za luwutuku lwa Yesu zasamunwa kwa mbasi ye nsangu za mbasi zamoneka kwa avungudi muna fuku una Yesu kawutuka.

Yoane ozeye wo vo e salu kiandi i vuba awana bavilukidi e ntima muna masumu mau. Kansi, Yesu kena ye sumu ko. Kana una vo Yoane kazolele ko, Yesu osiandamene vo: “Yambula diavangama owau, kadi mu mpila yayi i tulungisila mawonso mansongi.”—Matai 3:15.

Ekuma dinina o mfunu vo Yesu kavubwa? Yesu kevubwa mu kuma kia luviluku lwa ntima ko. O luvubu lwandi lusongele vo uyisunzuidi mu vanga luzolo lwa Se diandi. (Ayibere 10:5-7) Yesu salu kia vala nti kesalanga, kansi owau se keyantika e salu kina katuminwa ova ntoto kwa Se diandi kuna zulu. Nga Yoane ozeye wo vo sivi divangama vava kevuba Yesu?

Kuna kwalanda, Yoane wavova vo: “Ndiona wantuma yavubila muna maza, yandi wampovesa vo: ‘Konso ona omona okulumukina mwanda yo kala vana yandi, i yandi ndiona ovubila muna mwand’avelela.’” (Yoane 1:33) Kieleka, Yoane ovingilanga vo mwand’avelela wakulumukina muntu kevuba. Muna kuma kiaki, vava Yesu katombokele muna maza, Yoane kasivikidi ko wau kamwene “mwand’a Nzambi unkulumukini [Yesu] nze yembe.”—Matai 3:16.

Kansi, ke diau kaka ko divangamene muna luvubu lwa Yesu. “E zulu diziukidi.” Aweyi disongele? Nanga disongele vo muna kolo kia luvubu lwandi, Yesu ovutukidi zayi wawonso kakala wau kuna zulu. Yesu osungamene zingu kakala kiau kuna zulu se vangwa kia mwanda, osungamene mpe ludi kalongwa kwa Nzambi vitila keza ova ntoto.

Vana ntandu, vava Yesu kavubilu e ndinga itukidi kuna zulu, ivovele vo: “Ndioyo i Mwan’ame anzolwa, ona iyangalelanga.” (Matai 3:17) E ndinga yayi ya nani? Ke nding’a Yesu ko, kadi vamosi kena yo Yoane. E ndinga yayi ya Nzambi. Kieleka, Yesu i Mwan’a Nzambi. Ke yandi ko i Nzambi.

Diakiese mu zaya vo Yesu wa mwan’a Nzambi muntu, nze una wakala Adami wa muntu antete. Luka wa nlongoki a Yesu wasoneka mu kuma kia luvubu lwandi vo: “Vava Yesu kayantika e salu kiandi, tezo kia mvu 30 kakala, wauna bambadikilanga vo, mwan’a Yosefe, wa mwan’a Eli, . . . wa mwan’a Davidi, . . . wa mwan’a Abarayama, . . . wa mwan’a Noa, . . . wa mwan’a Adami, wa mwan’a Nzambi.”—Luka 3:23-38.

Wauna Adami kakadila muntu, o Yesu wa “mwan’a Nzambi” mpe i muntu. Kansi wau kavubilu, Yesu obakwidi vo yandi i Mwan’a Nzambi, ona okituka vangwa kia mwanda kuna zulu. Yesu okubamene mu longa e ludi kia Nzambi kwa wantu yo kubasonga nzil’a moyo. E salu kayantikidi o Yesu kikumfila mu yekola moyo andi se kimenga muna wete dia wantu.