Ngondo mitue ku isambombo Yone Mubatiji mumane kutuadija mudimu wende wa diyisha, Yezu wakalua kudiye ku Musulu wa Yadene, ukavua dîba adi ne bidimu bitue ku 30. Uvua mulue bua tshinyi? Kavua mulue kumutangila patupu to. Yezu kavua musue patupu kumona muvua mudimu wa Yone wenda to. Kadi uvua mulue bua kuambila Yone bua amubatize.

Yone wakabenga wamba ne: “Meme ke udi ukengela kulua kuudi bua umbatize, kadi wewe udi ulua kundi meme anyi?” (Matayi 3:14) Udi ubenga bualu mmumanye ne: Yezu mMuana wa pa buende wa Nzambi. Vuluka ne: patshivua Yone mu difu dia mamuende Elizabeta, wakatumpika ne disanka dionso pavua Mariya utshivua ne difu dia Yezu mulue kutangila mamuende eu. Pamuapa mamuende wa Yone uvua mumulondele bualu abu. Bavua mua kuikala kabidi bamuambile bua muvua muanjelu mumanyishe diledibua dia Yezu ne bua banjelu bavua bamuenekele balami ba mikoko butuku buakalelabu Yezu.

Yone mmumanye ne: dibatiza didiye ubatiza bantu ndia dinyingalala bua mpekatu yabu. Kadi Yezu kavua ne mpekatu to. Nansha muvua Yone mubenge, Yezu wakamusumisha wamba ne: “Lekela bikale nanku musangu eu, bualu mushindu eu ke udi mukumbane bua tuetu kukumbaja malu onso adi makane.”​—Matayi 3:15.

Bua tshinyi bivua bimpe bua Yezu abatijibue? Kabavua babatiza Yezu bu tshimanyinu tshia ne: mmunyingalale bua mpekatu yende to. Batismo wende uvua uleja ne: uvua udifila bua kuenza disua dia Tatuende. (Ebelu 10:5-7) Yezu uvua muena mabaya, kadi mpindieu tshivua tshikondo tshia yeye kutuadija mudimu uvua Tatuende wa mu diulu mumutumine pa buloba. Uvua wela meji ne: Yone uvua mutekemene bua bualu kampanda bua pa buabu buenzeke pavuaye ubatiza Yezu anyi?

Yone wakalua kuamba pashishe ne: “Eu muine uvua muntume bua kubatizangana mu mâyi wakangambila ne: ‘Muntu uudi umona nyuma umupuekela, ushala pa mutu pende, yeye au ke udi ubatizangana mu nyuma muimpe.’” (Yone 1:33) Nanku Yone uvua mutekemene bua nyuma wa Nzambi apueke pa mutu pa muntu kampanda uvuaye ubatiza. Nunku, musangu umue padi Yezu ujuka mu mâyi, kabiena mua kukemesha Yone padiye umona “nyuma wa Nzambi upueka bu nyunyi wa nkutshi, ulua pambidi [pa Yezu]” to.​—Matayi 3:16.

Kadi ki nganu atshi tshivua tshienzeke dîba dia batismo wa Yezu to. ‘Diulu diakamubululukila.’ Bidi biumvuija tshinyi? Bidi mua kuikala biumvuija  ne: pavuabu babatiza Yezu apu, wakavuluka nsombelu uvuaye nende mu diulu kumpala kua kuluaye pa buloba. Nanku, dîba adi Yezu uvua uvuluka nsombelu uvuaye nende bu muana wa mu nyuma wa Yehowa, pamue ne malu avua Nzambi mumulongeshe mu diulu kumpala kua kuluaye pa buloba.

Bualu bukuabu, pavuabu babatiza Yezu, dîyi diakafuma mu diulu diamba ne: “Eu udi Muananyi, munanga, undi muanyishe.” (Matayi 3:17) Dîyi adi divua dia nganyi? Kadivua mua kuikala dia Yezu to, bualu bavua ne Yone muaba au. Divua dia Nzambi. Bushuwa, Yezu uvua Muana wa Nzambi. Kadi yeye kavua Nzambi muine to.

Mbimueneke patoke ne: Yezu uvua muana wa Nzambi muikale ne mubidi wa buntu, anu muvua Adama, muntu wa kumpala. Muyidi Luka mumane kumvuija muvua batismo wa Yezu, wakamba ne: “Pakatuadija Yezu mudimu wende, uvua ne bidimu bitue ku 30, ne bantu bavua bela meji ne: uvua muana wa Jozefe, muana wa Heli, . . . muana wa Davidi, . . . muana wa Abalahama, . . . muana wa Noa, . . . muana wa Adama, muana wa Nzambi.”​—Luka 3:23-38.

Anu muvua Adama “muana wa Nzambi” kadi muikale muntu, ke muvua Yezu kabidi. Pakabatizabu Yezu, wakabuela mu malanda mapiamapia ne Nzambi, kuluaye Muana wa Nzambi wa mu nyuma. Nunku, Yezu uvua mukumbane bua kulongesha bulelela bua kudi Nzambi ne kuleja bantu njila wa muoyo. Wakatuadija nsombelu uvua ne bua kulua kumufikisha ku difila too muoyo wende wa buntu bu mulambu bua bukua bantu bena mpekatu.